ჯანდაცვის მინისტრის მოადგილის, თამარ გაბუნიას თქმით, ქვეყნის მოსახლეობის 30% განწყობილია, რომ აიცრას, თუმცა, გარკვეული მიზეზების გამო ამას ვერ აკეთებს. მისი თქმით, მათთან მეტი მუშაობაა საჭირო, რის გამოც, სამინისტრო ვაქცინაციის კამპანიის კარდაკარ პრინციპზეა გადასული.

"ვაქცინაციის პირველი ეტაპი არის აქტიური კომუნიკაციის ეტაპი, როდესაც მოსახლეობის 40% თავისივე გადაწყვეტილებით აქტიურად მოდის და გვახსოვს, ეს რამდენად აქტიური იყო. ჩვენ ახლა გადავედით შემდეგ ეტაპზე, რომ მეტად კარდაკარ პრინციპით ვცდილობთ, მოვიზიდოთ დაახლოებით ის 30% მოსახლეობის, რომელიც განწყობილია, რომ აიცრას, მაგრამ რაღაც მიზეზების გამო ჯერ-ჯერობით ვერ აიცრა. მათთან მეტი მუშაობაა საჭირო და ესეც იქნება ოქტომბრის-ნოემბრის ბოლომდე, ეტაპობრივად, ეს ჩვენთვის მომდევნო ფაზა", — ამბობს გაბუნია.

მისივე თქმით, ამის შემდეგ იწყება მესამე ეტაპი, როცა რჩება ჯგუფი, რომელიც არ ექვემდებარება "ასეთ მარტივ საინფორმაციო კამპანიას".

20 ოქტომბრის მონაცემებით, საქართველოში სულ ჩატარდა 1 926 893 აცრა, დღიურად აცრილია 5 543 ადამიანი. დღეს დადასტურდა კორონავირუსის 5 219 ახალი შემთხვევა დადასტურდა, გამოჯანმრთელდა — 2 348, ხოლო გარდაიცვალა 42 ადამიანი.

საქართველოში ამ დროისთვის 4 სხვადასხვა ვაქცინაა ხელმისაწვდომი, თუმცა ასტრაზენეკათი აცრა მხოლოდ იმ ადამიანებს შეუძლიათ, ვინც ერთი დოზა უკვე გაიკეთა.

ვაქცინაციის პროგრამაში ჩართვა შეუძლია ყველა მსურველს, 16 წლის ზემოთ. გარდა ამისა, ქრონიკული დაავადებების ან საზღვარგარეთ წასვლის აუცილებლობის შემთხვევაში, აცრას შეძლებენ 12-წლიდან ბავშვებიც.

უკვე შესაძლებელია ბუსტერითა და ჩანაცვლებით სარგებლობაც. დეტალები ნახეთ აქ: ვინ მიიღებს, როდის და როგორ — რა უნდა ვიცოდეთ ბუსტერსა და ჩანაცვლებაზე

ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

იხილეთ იმ დაწესებულებების ჩამონათვალი, სადაც შესაძლებელია ვაქცინაცია. სია პერიოდულად ახლდება და ადგილები ემატება.

ასევე, შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაცის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.