არსებობს ფაქტები, რომელიც არასწორად ვიცით. ბევრ მათგანს სკოლაში გვასწავლიდნენ ხოლმე, თუმცა დროის სვლასთან ერთად, მეცნიერებამ დაამტკიცა, რომ არ არსებობს შეუცვლელი ფაქტები. ჩვენ მოგიყვებით ხუთ ფაქტზე, რომელიც სიმართლე გვეგონა, სკოლაშიც გვასწავლეს, მაგრამ ბოლოს მცდარი აღმოჩნდა.

1. პლუტონი პლანეტა გვეგონა

1800-იან წლებიდან მოყოლებული ასტრონომები თვლიდნენ, რომ მზის სისტემაში ურანის იქით, კიდევ არსებობდა მეცხრე პლანეტა, რომელიც 1930 წელს აღმოაჩინეს და პლუტონი დაარქვეს.

2003 წელს ნასამ პლუტონის იქით მასზე დიდი პლანეტა ირისი აღმოაჩინა. ამ აღმოჩენამ მეცნიერებს პლანეტობის კრიტერიუმების გადახედვისკენ უბიძგა. ახალი კონცეფციით გადაწყდა, რომ პლუტონი თავისი ზომითა და მდებარეობით არ აკმაყოფილებდა სრულყოფილი პლანეტის თვისებებს. დღეს პლუტონი ჯუჯა პლანეტად ითვლება.

2. ბრილიანტი ყველაზე მყარი ნივთიერება გვეგონა

Scientific American-ის ცნობით, 2009 წლიდან მოყოლებული ბრილიანტზე უფრო მყარი ორი ნივთიერებაა ცნობილი. დღეისთვის ყველაზე მყარი ნივთიერება ულტრამყარი ნანომეტრული კუბური ბორის ნიტრიდია, რომელიც ბუნებაში ძალიან რთული მოსაპოვებელია.

გამომდინარე აქედან, თუ გსურთ ყველაზე მყარი და ძვირფასი ნივთიერება აჩუქოთ თქვენს პარტნიორს, ამისათვის ბრილიანტის ყიდვა აღარ არის საჭირო. მის ნაცვლად შეგიძლიათ ულტრამყარი ნანომეტრული კუბური ბორის ნიტრიდი მიართვათ.

3. გვეგონა, რომ პირამიდები ებრაელმა მონებმა ააგეს

როდესაც სკოლაში ეგვიპტურ პირამიდებზე გვიწევდა საუბარი, მასწავლებელი ყოველთვის აღნიშნავდა, რომ პირამიდები ებრაელმა მონებმა ააგეს. ეს აზრი არის გატარებული სხვადასხვა ფილმებშიც, მაგალითად ისეთში, როგორიცაა "The Prince Of Egypt".

სინამდვილეში პირამიდები არათუ ებრაელ, არამედ მონებს საერთოდ არ აუგიათ.

როგორც კვლევები მოწმობს, პირამიდების ასაგებად მუშებს ეგვიპტის სხვადასხვა მხარეში ქირაობდნენ და ისინი დიდ პატივშიც კი ჰყავდათ.

4. გვეგონა, რომ ფურცლის შვიდზე მეტჯერ გადაკეცვა შეუძლებელი იყო

ალბათ გსმენიათ, რომ ფურცლის შვიდზე მეტჯერ გადაკეცვა შეუძლებელი არის.

ამ ტაბუს არ შეეგუა ერთი ამერიკელი სტუდენტი. მან რამდენიმე მოხალისესთან ერთად გიგანტური ტუალეტის ქაღალდი იყიდა და ყველასთვის გასაოცრად 11-ჯერ გადაკეცა. ამის შემდეგ, კიდევ ერთმა სტუდენტმა მისი რეკორდი გააუმჯობესა და ფურცელი ცამეტჯერ გადაკეცა.

5. ჩინეთის დიდი კედელი ადამიანის ერთადერთი ქმნილება იყო, რომელიც კოსმოსიდან ჩანდა

სინამდვილეში, არც ეს იყო მაინცდამაინც სიმართლე. მითი ჩინელმა ასტრონავტმა დაანგრია, რომელმაც კოსმოსში მოგზაურობის შემდეგ განაცხადა, რომ მან ჩინეთის დიდი კედელი ვერ დაინახა.

მოგვიანებით, კოსმოსში გადაღებული ფოტოებიდან ჩანს, რომ ჩინეთის დიდი კედელი მთლიანად არ მოჩანს, მაგრამ მისი კონტურის გარჩევა მაინც შესაძლებელია. ჩინეთის დიდი კედელის გარდა, კოსმოსიდან განათებული ქალაქები, ზოგიერთი აეროპორტი, ხიდები და სხვა ნაგებობებიც მოსჩანს.

ასე რომ, ჩინეთის დიდი კედელი არც პირველი და არც უკანასკნელია, რისი დანახვაც კოსმოსიდან შეიძლება.