ექსპრეზიდენტ მიხეილ სააკაშვილის ადვოკატი, დიმიტრი საძაგლიშვილი აცხადებს, რომ პრემიერმინისტრ ირაკლი ღარიბაშვილის განცხადება სააკაშვილთან დაკავშირებით სამარცხვინოა და ღარიბაშვილი ის ადამიანია, რომლისთვისაც ვაჟკაცობა სკოლის მოსწავლეების დაშინებაა. ამით ის ბერა ივანიშვილისა და ირაკლი ღარიბაშვილის ჩანაწერებზე მიუთითებს.

"ჩვენ დღეს ვნახეთ ივანიშვილის ოჯახის მოურავის სრულიად სამარცხვინო განცხადება, სადაც ის საუბრობს ვითომ სააკაშვილის ვაჟკაცობაზე და რელევანტურობასთან დაკავშირებით აყენებს კითხვის ნიშნებს. არ უნდა დაგვავიწყდეს, რომ ეს არის ადამიანი, რომლისთვისაც ვაჟკაცობა არის სკოლის მოსწავლეებთან კანარეიკიანი მანქანების გაგზავნა და ბავშვების "დაკაჩავება", რომ მეორე დღეს სკოლაში ვერ მივიდნენ", — აცხადებს საძაგლიშვილი.

დღეს, 6 ოქტომბერს პრემიერმინისტრმა, ირაკლი ღარიბაშვილმა ექსპრეზიდენტ მიხეილ სააკაშვილზე ვრცელი ფეისბუქპოსტი გამოაქვეყნა, რომელშიც ავითარებს სხვადასხვა აზრს, განიხილავს ჭორს და თეორიას იმაზე, თუ რატომ ჩამოვიდა ის ქვეყანაში.

არჩევნების წინა დღეს, პირველ ოქტომბერს მიხეილ სააკაშვილმა დაპოსტა, რომ საქართველოში იმყოფებოდა. რამდენიმე საათში მან კიდევ ორი ვიდეო გაავრცელა, რომელშიც ამბობდა, რომ ბათუმშია და აქტიურად აპირებს ბრძოლას. ქართულ ოცნებაში ამტკიცებდნენ, რომ ის არათუ ქვეყანაში არ შემოსულა და კვლავ უკრაინაში იყო. ამ განცხადებებიდან რამდენიმე საათში პრემიერმინისტრმა, ირაკლი ღარიბაშვილმა შინაგან საქმეთა მინისტრთან და სახელმწიფო უსაფრთხოების სამსახურის ხელმძღვანელთან ერთად ბრიფინგი გამართა, სადაც თქვა, რომ სააკაშვილი დაკავებულია და პენიტენციურ დაწესებულებაში გადაიყვანეს.