ქართული ოცნების დეპუტატისა და ადამიანის უფლებათა კომიტეტის თავმჯდომარის, მიხეილ სარჯველაძის აზრით, მიხეილ სააკაშვილი საქართველოში არ იმყოფება. მისი თქმით, ამაში მას ეჭვი არ ეპარება.

"ძალიან მეეჭვება, რომ ეს ასე იყოს, უბრალოდ, კამათში, ასე ვთქვათ, პატივს ვცემ თქვენს მოწოდებას და სურვილს, რომ ეს ასე იყოს და ასე იმიტომ გესაუბრებით, თორემ, მე პირადად, არავითარი ეჭვი არ მეპარება, რომ ის აქ არ არის, ნამდვილად არ ვფიქრობ ასე, არ დააგვიანებს მტკიცებულება თუ ის აქ არის, ხო?", — ამბობს სარჯველაძე.

ჟურნალისტის კითხვას, რა შემთხვევაში დაიჯერებს, რომ სააკაშვილი საქართველოშია, სარჯველაძე პასუხობს, რომ "როდესაც კონკეტულად გამოჩნდება ადამიანი".

"აი, გულწრფელად გეტყვით, რომ როგორც აქამდე არავითარი ეჭვი არ მეპარებოდა, რომ, მიუხედავად განცხადებებისა, რომ სიცოცხლესო და თავისუფლებას ვწირავო და ა.შ., როგორც არ იყო ეს კაცი ჩამომსვლელი და ციხეში ჩამჯდომი, აი იგივენაირად გეუბნებით ახლაც, რომ ბევრი რაღაც, რასაც გთავაზობთ, როგორც სიმართლეს, სინამდვილეში არის აბსოლუტურად ტყუილი. ცდილობს საკუთარი ამომრჩეველი შეცდომაში შეიყვანოს, რომ რაღაცნაირად იქნებ აიძულოს, რომ ხმა მისცენ".

დღეს, პირველ ოქტომბერს მიხეილ სააკაშვილმა Facebook-ზე პოსტი გამოაქვეყნა რომელმაც შექმნა ვარაუდი, რომ შესაძლოა, ის უკვე საქართველოშია. ამასთან, მან გაავრცელა ორი ვიდეოც, სადაც ამბობს, რომ ბათუმშია, ფონად კი ქალაქის ხედი ჩანს.

შინაგან საქმეთა სამინისტროში ამბობენ, რომ ექსპრეზიდენტს ქვეყნის საზღვარი არ გადმოუკვეთავს. ქართული ოცნების თავმჯდომარე ირაკლი კობახიძე კი ამტკიცებს, რომ სააკაშვილი საქართველოში არ არის, მისი ვიდეოები ფეიკია და იმაზე უფრო მარტივი ტექნოლოგიითაა გაკეთებული, ვიდრე DeepFake. მის პასუხად სააკაშვილის თანაგუნდელები ამბობენ, რომ ის ნამდვილად ჩამოვიდა,

აღსანიშნია ისიც, რომ 27 სექტემბერს სააკაშვილმა სოციალურ ქსელში გამოაქვეყნა კიევი-თბილისის თვითმფრინავის ბილეთი, რომლის მიხედვითაც 2 ოქტომბერს, დედასთან, გიული ალასანიასთან ერთად უნდა ჩამოფრენილიყო.

ამავე თემაზე: