ერთიანი ნაციონალური მოძრაობის ერთ–ერთი ლიდერი, თინა ბოკუჩავა ექსპრეზიდენტ მიხეილ სააკაშვილის საქართველოში სავარაუდო ჩამოსვლასთან დაკავშირებით ამბობს, რომ სააკაშვილი საკუთარ სიტყვას ასრულებს.

"დღეს მას ქართველი ხალხის აბსოლუტური უმეტესობა ითხოვს, ამ ქვეყნის უკეთესი მომავლისთვის და პრეზიდენტი სააკაშვილი უბრალოდ ასრულებს საკუთარ სიტყვას", — აცხადებს ბოკუჩავა.

კითხვაზე, შეუძლია თუ არა მას დადასტურებულად თქვას, იმყოფება თუ არა სააკაშვილი საქართველოში, ბოკუჩავა პასუხობს, რომ — კი.

დღეს, პირველ ოქტომბერს მიხეილ სააკაშვილმა Facebook-ზე პოსტი გამოაქვეყნა, რომელმაც შექმნა ვარაუდი, რომ შესაძლოა, ის უკვე საქართველოში იმყოფება. ამასთან, მან გაავრცელა ვიდეოც, სადაც ამბობს, რომ ბათუმშია. მანამდე კი სააკაშვილმა 27 სექტემბერს სოციალურ ქსელში გამოაქვეყნა კიევი-თბილისის თვითმფრინავის ბილეთი, რომლის მიხედვითაც 2 ოქტომბერს, დედასთან, გიული ალასანიასთან ერთად უნდა ჩამოფრენილიყო.