იურისტი, გიორგი მშვენიერაძის განცხადებით, თავდაცვის სამინისტროს სარჩელი თავდაცვის ყოფილი მინისტრისა და ტელეკომპანია ფორმულას მეწილის, დავით კეზერაშვილის წინააღმდეგ გზავნილია მედიისთვის, რომ მათ, შესაძლოა, საფრთხე დაემუქროთ. მისივე თქმით, აღნიშნული საქმის უკან ტელევიზიის გაკონტროლების ინტერესი დგას.

"ჩვენ რომ ვცხოვრობდეთ სამართლებრივ სახელმწიფოში, სადაც კანონის შერჩევითად გამოყენება არ ხდება და სადაც არ არსებობს პოლიტიკური დევნის ან დამოუკიდებელი და კრიტიკული მედიის დევნის პრეცენდენტები, მაშინ, შესაძლოა, ეს საქმე აღქმული ყოფილიყო ცალკე, როგორც რიგითი, მიმდინარე სამართალწარმოება. მაგრამ ჩვენ ასეთ სახელმწიფოში არ ვცხოვრობთ. ჩვენთვის ძალიან ნათელია, რომ ამ საკითხის უკან შესაძლებელია იყოს ინტერესი, რაც უკავშირდება თქვენი ტელევიზიის გაკონტროლებას ან მისი წილის დაყადაღებას, რაც ირიბი ზემოქმედების საშუალება იქნება სარედაქციო პოლიტიკაზე", — განაცხადა მან.

მშვენიერაძე ასევე აღნიშნავს, რომ სასამართლოს მიერ აქამდე მიღებული გადაწყვეტილება კეზერაშვილის საქმეზე პოლიტიკურად მოტივირებულია და უკავშირდება მის მფლობელობაში არსებულ ტელევიზიას, რომლის კრიტიკულობაც ხელისუფლებას არ მოსწონს.

"გვახსოვს ღარიბაშვილის განცხადება პარლამენტში, რომ ბატონი კეზერაშვილის საქმეს მალე მიეხედებოდა, მოჰყვა უზენაესი სასამართლოს მიერ გამოტანილი გამამტყუნებელი განაჩენი, ორი ქვედა ინსტანციის სასამართლოს გამამართლებელი განაჩენის შემდგომ. ამიტომ, ეს კონტექსტი გვაჩვენებს, რომ რაღაც გადაწყვეტილება მიღებულია ხელისუფლებაში, მათ შორის, როგორც ბატონი კეზერაშვილის, ასევე მის ნაწილობრივ მფლობელობაში არსებულ ტელევიზიასთან მიმართებაში, რადგანაც ეს ტელევიზია ძალიან არ მოსწონს ხელისუფლებას მისადმი კრიტიკულობის გამო", — ამბობს ფორმულასთან მშვენიერაძე.

დღეს, 30 სექტემბერს, თავდაცვის სამინისტრომ დავით კეზერაშვილის მიმართ სასამართლოში სარჩელი შეიტანა. სამინისტროს განცხადებით, ისინი თავდაცვის უწყების მიმართ "დანაშაულებრივი ქმედებით მიყენებული ზიანის" ანაზღაურებას ითხოვენ.

7 სექტემბერს უზენაესმა სასამართლომ ყოფილ მაღალჩინოსანსა და ტელეკომპანია ფორმულას დამფუძნებლს, დავით კეზერაშვილს 5-წლიანი პატიმრობა მიუსაჯა. ადვოკატის ინფორმაციით, თავდაცვის ყოფილ მინისტრის, დავით კეზერაშვილს პროკურატურა საწვრთნელ პროექტში 5 მილიონზე მეტი თანხის გაფლანგვას ედავებოდა, თუმცა, მას ბრალი ვერ დაუმტკიცდა ვერც საქალაქო და ვერც სააპელაციო სასამართლოში.