პარლამენტის თავჯდომარემ, კახა კუჭავამ დიპლომატების შესაძლო მოსმენის შეახებ დასმული კითხვის პასუხად განაცხადა, რომ უკანონო მოსმენა დარღვევა და დანაშაულია, თუ შესაბამისი სამართლებრივი საფუძველი არ არსებობს. მისივე თქმით, უსაფრთხოების სამსახურის გადასაწყვეტია, ვის მოუსმენს კანონიერების ფარგლებში.

"უკანონობაა ყველანაირი უკანონო მოსმენა ხო, თვითონ სიტყვა ამბობს, თუ უკანონო მოსმენებზე ვსაუბრობთ ესეიგი უკვე დარღვევა არის და დანაშაული არის. ის, თუ უსაფრთხოების სამსახური რას ჩათვლის, ვის ჩათვლის მოუსმინოს კანონიერების ფარგლებში, ეს არის ქვეყნის უსაფრთხოების საკითხი და გადასაწყვეტია შესაბამისი უწყების მიერ. ზუსტად ამაზე ვსაუბრობდით, რომ მოსმენა იქნება თუ იქნება შემდეგ სხვა ზომები მიღებული პარლამენტში, ეს ის კითხვებია, რომლებიც უნდა დაისვას და შესაბამისმა კომპეტენტურმა პირებმა, წარმომადგენლებმა ამ უწყებების უნდა გასცეს პასუხი. ამიტომ ვერ გეტყვით, რადგან არ არის ინფორმაცია, ჯერჯერობით არის მხოლოდ, ასე ვთქვათ, ჭორაობა.

არავის მოსმენა არ არის კანონიერი თუ ამის შესაბამისი სამართლებრივი საფუძველი არ არსებობს", — განუცხადა კუჭავამ ჟურნალისტებს მოსმენებთან დაკავშირებით.

მისივე თქმით, სულერთია ვის უსმენენ, რადგან ნებისმიერ უკანონო მოსმენას შესაბამისი რეაგირება უნდა მოჰყვეს. ჟურნალისტის კითხვაზე, შეიძლება თუ არა, დიპლომატის მოსმენა კანონიერი იყოს, კუჭავა პასუხობს:

"დიპლომატი რა შუაშია, თქვენი [ჟურნალისტების ] მოსმენა ნორმალურია დიპლომატთან შედარებით? თუ უკანონო მოსმენა არის ეს არის ყოვლად მიუღებელი და შესაბამისი რეაგირება უნდა მოყვეს ამას, არ აქვს მნიშვნელობა ვისი მოსმენა ხდება, ჩვეულებრივი ადამიანიც რომ იყოს, თუ უკანონო არის, მემგონი მარტივია".

ამასთან, ჟურნალისტის კითხვაზე, ფსიქიკურად დაავადებული ადამიანის მოსმენის ჩანაწერები უნდა განადგურდეს თუ არა, კუჭავამ განაცხადა, რომ ყველაფერი უნდა განადგურდეს. მისივე თქმით, არც ტელევიზიების მხრიდან ჩანაწერების გავრცელება არის სწორი.

"ზოგადად ყველაფერი უნდა განადგურდეს და რასაც ვხედავთ დღეს ტელევიზიაში ისიც არ არის სწორი გარკვეული რაღაც ჩანაწერები რომ გამოდის. მესმის, რომ ეს კარგი საფუძველია გახდეს რაღაც სენსაციური ამბის წყარო, მაგრამ ჩვენ თუ ვსაუბრობთ იმაზე, რომ უკანონო მოსმენა იყო, ამის გამოტანა რამდენად სწორად მიაჩნია ვინმეს? ხომ ასეა? ყველასთვის პრობლემა არის, როგორ შეიძლება ნორმალური ადამიანისთვის არ იყოს პრობლემა, თუ მას უკანონოდ უსმენენ", — განაცხადა მან.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა ჩანაწერებში საკუთარი საუბრები ამოიცნეს.

ჩანაწერების მიხედვით, უსმენენ და უთვალთვალებენ სასულიერო პირებს, ელჩებსა და საელჩოების თანამშრომლებს, არასამთავრობო ორგანიზაციების წევრებს, აქტივისტებს, პოლიტიკოსებს, ჟურნალისტებს, ძალადობრივი ჯგუფის წევრებსა და ლიდერებს და ამ ადამიანებთან კავშირში მყოფ მოქალაქეებს. ამასთან, ჩამონათვალში შეხვდებით კონკრეტული სასულიერო პირების მძღოლებს, საპატრიარქოს დაცვას, სტიქაროსნებს, თეოლოგებსა და სამების დამლაგებელსაც კი. ფაილებს შორის არის ინფორმაცია საპატრიარქოში რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც ავთენტურობას არც უარყოფს და არც ადასტურებს. უწყება აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას.

14 სექტემბერს საქმეზე გამოძიება პროკურატურამ კერძო კომუნიკაციის საიდუმლოების დარღვევის მუხლით დაიწყ, 18 სექტემბერს კი დამატებით განცხადება გაავრცელა, სადაც მიუთითა, რომ გამოძიება ფარული მასალების შემდგენსა და მომპოვებლებსაც ეძებს. მათივე განცხადებით, სამართლებრივი დახმარების ფარგლებში, აშშ-სა და სხვა ქვეყნებს გამოძიებით დადგენილ სერვერებზე მონაცემების შენახვისა და გამოთხოვის მიზნით მიმართეს.

გაიგეთ მეტი: