პარტია დროას თავმჯდომარე, ელენე ხოშტარია ქართული ოცნების გენერალური მდივნის, კახა კალაძის განცხადებას ოქსიმორონს უწოდებს. ის ამბობს, რომ დიპლომატის მოსმენა ნებისმიერ შემთხვევაში უკანონობაა.

"რაც მან თქვა, ჯერ ერთი ოქსიმორონია, ანუ, კანონის ფარგლებში მოუსმინო დიპლომატს, ეგეთი რამე არ არსებობს. იმიტომ, რომ ვენის კონვენცია არეგულირებს ამას და უკანონობა არის დიპლომატის მოსმენა. მეორე, როგორ უნდა მოგივიდეს თავში, ასეთი მასშტაბური მოსმენების მერე თქვა, სოლიდარობა სუს-სო?! როგორ უნდა მოგივიდეს თავში, ასეთი მასშტაბური სკანდალის მერე, დიპლომატების მოსმენის მერე თქვა — დიახაც, მოვუსმენთ. თვითგანაჩენს იკეთებენ", — განაცხადა ხოშტარიამ ფორმულას ეთერში.

ხოშტარიამ აღნიშნა ისიც, რომ გაუკვირდა კალაძისგან მსგავსი განცხადება, რადგან, როგორც თვითონ ამბობს, ის მუდმივად ცდილობდა "დისტანცირებას ამ სიბინძურეებისგან".

საქართველოში აკრედიტებული ელჩების შესაძლო მოსმენებთან დაკავშირებით, კახა კალაძემ განაცხადა, რომ "თუ საჭიროა", სუს-მა მათაც უნდა მოუსმინოს. მალევე, პარტიის თავმჯდომარემ, ირაკლი კობახიძემ ეს ინფორმაცია უარყო და განაცხადა, რომ "არანაირი დიპლომატების მოსმენა საქართველოში არ ხორციელდება."

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს. ჩანაწერების მიხედვით, უსმენენ და უთვალთვალებენ სასულიერო პირებს, ელჩებსა და საელჩოების თანამშრომლებს, არასამთავრობო ორგანიზაციების წევრებს, აქტივისტებს, პოლიტიკოსებს, ჟურნალისტებს, ძალადობრივი ჯგუფის წევრებსა და ლიდერებს და ამ ადამიანებთან კავშირში მყოფ მოქალაქეებს. ამასთან, ჩამონათვალში შეხვდებით კონკრეტული სასულიერო პირების მძღოლებს, საპატრიარქოს დაცვას, სტიქაროსნებს, თეოლოგებსა და სამების დამლაგებელსაც კი. ფაილებს შორის არის ინფორმაცია საპატრიარქოში რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც ავთენტურობას არც უარყოფს და არც ადასტურებს. უწყება აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. 14 სექტემბერს საქმეზე გამოძიება პროკურატურამ კერძო კომუნიკაციის საიდუმლოების დარღვევის მუხლით დაიწყ, 18 სექტემბერს კი დამატებით განცხადება გაავრცელა, სადაც მიუთითა, რომ გამოძიება ფარული მასალების შემდგენსა და მომპოვებლებსაც ეძებს. მათივე განცხადებით, სამართლებრივი დახმარების ფარგლებში, აშშ-სა და სხვა ქვეყნებს გამოძიებით დადგენილ სერვერებზე მონაცემების შენახვისა და გამოთხოვის მიზნით მიმართეს.

გაიგეთ მეტი: