უკრაინისთვის ამერიკული იარაღის მიწოდების შეჩერება არ ნიშნავს, რომ ვაშინგტონი უარს ამბობს კიევის მხარდაჭერაზე. ამის შესახებ 2 ივლისს, ამერიკის შეერთებული შტატების სახელმწიფო დეპარტამენტის ოფიციალურმა წარმომადგენელმა, ტემი ბრიუსმა განაცხადა.

"ჩვენ არ ვწყვეტთ უკრაინისთვის იარაღის მიწოდებას, შეიცვალა მხოლოდ ერთი ასპექტი, ერთი სიტუაცია. ხაზს ვუსვამ, რომ ეს არ ნიშნავს უკრაინისთვის დახმარებისა და იარაღის მიწოდების შეწყვეტას", — განაცხადა ბრიუსმა.

როგორც მან აღნიშნა, რომ ამ სიტუაციამ უკრაინის კონფლიქტის მოგვარების მოლაპარაკებებზე გავლენა არ უნდა მოახდინოს.

კიევისთვის იარაღის მიწოდების შეჩერებას გამოეხმაურა პენტაგონის წარმომადგენელი შონ პარნელიც და თქვა, რომ ეს პრაგმატული ნაბიჯია.

"ჩვენ ამას საღი აზრის გამოვლინებად მივიჩნევთ, პრაგმატულ ნაბიჯად იმ სტრუქტურის შესაქმნელად, რომელიც შეაფასებს, თუ რომელი საბრძოლო მასალა იგზავნება და სად", — განუცხადა პარნელმა ჟურნალისტებს ბრიფინგზე.

პენტაგონმა უარი თქვა დაეკონკრეტებინა, თუ რამდენი და რა ტიპის საბრძოლო მასალის გაგზავნას აგრძელებს შეერთებული შტატები უკრაინაში.

კრემლის პრესსპიკერმა დიმიტრი პესკოვმა თქვა, რომ საბრძოლო მასალის მიწოდების შეჩერება ნიშნავს, რომ ვაშინგტონს მასალის დეფიციტი აქვს და ასევე, "სპეციალური სამხედრო ოპერაციის უფრო სწრაფად დასრულების იმედსაც" აჩვენებს.