ექვსწლიანი დაგვიანების შემდეგ, ინდოეთი საბოლოოდ იწყებს მოსახლეობის დათვლას ორფაზიანი აღწერის ფარგლებში, რომელიც 2027 წელს დასრულდება, — აცხადებს ინდოეთის მთავრობა. ეს პროცესი ხელისუფლებას $500 მილიონი დაუჯდება.

ინდოეთის მოსახლეობის აღწერა მსოფლიოს ერთ-ერთი უმსხვილესი ადმინისტრაციული პროცედურაა და უზრუნველყოფს კრიტიკულად მნიშვნელოვან მონაცემებს სოციალური პროგრამების დაგეგმვისთვის, ფედერალური ფონდების განაწილებისთვის, საარჩევნო ოლქების განსაზღვრისა და მნიშვნელოვან პოლიტიკურ გადაწყვეტილებათა მისაღებად.

თავდაპირველი გეგმით აღწერა 2021 წელს უნდა ჩატარებულიყო, თუმცა მას შემდეგ რამდენჯერმე გადაიდო. ბოლოს ინდოეთის მოსახლეობის აღწერა 2011 წელს ჩატარდა.

პრემიერ-მინისტრ ნარენდრა მოდის მთავრობა თავდაპირველად აღწერის გადადების მიზეზად COVID-19 პანდემიას ასახელებდა, თუმცა კრიტიკოსები კითხვის ნიშნებს სვამენ იმის თაობაზე, რატომ გაჭიანურდა პროცესი ასე ძალიან.

ოთხშაბათს ინდოეთის შინაგან საქმეთა სამინისტრომ განცხადებაში აღნიშნა, რომ დიდი ხნით ნანატრი აღწერა ორ ფაზად ჩატარდება, ხოლო დასრულების მიახლოებით თარიღად 2027 წლის 1 მარტი განისაზღვრა.

ჰიმალაის თოვლით დაფარული რეგიონებისთვის – მათ შორის უტარაკჰანდი, ჰიმაჩალ-პრადეში, ლადახი და ჯამუ-ქაშმირი – აღწერის დასრულების პირობითი თარიღი იქნება 2026 წლის 1 ოქტომბერი.

თუმცა, კონკრეტულად როდის დაიწყება აღწერა, განცხადებაში არ არის აღნიშნული.

დამოუკიდებელი ინდოეთის ისტორიაში პირველად, მთავრობა ასევე შეაგროვებს მოქალაქეების კასტის მონაცემებს – რაც ინდოეთში პოლიტიკურად და სოციალურად სენსიტიური საკითხია, — აღნიშნულია განცხადებაში.

ბოლო შემთხვევა, როდესაც კასტები ოფიციალურად დაითვალეს აღწერის ფარგლებში, 1931 წელს იყო, ბრიტანული კოლონიური მმართველობის პერიოდში.

ექსპერტები საუბრობენ იმ შედეგებზე, რაც შესაძლოა ჰქონდეს მოსახლეობის აღწერის დაგვიანების მსგავს შემთხვევას მსოფლიოს ყველაზე მჭიდროდ დასახლებულ ქვეყანაში – მათ შორის, ადამიანების გამორიცხვას სოციალური პროგრამებიდან და რესურსების არასწორ განაწილებას.

"აღწერა მხოლოდ ქვეყნის მოსახლეობის რაოდენობრივ დათვლას არ ნიშნავს. ის იძლევა ფასდაუდებელ მონაცემებს, რომლებიც აუცილებელია დეტალურ დონეზე გადაწყვეტილებების მისაღებად," – განუცხადა BBC-ს 2023 წელს განვითარების ეკონომისტმა პროფესორმა კეი პი კანანმა.