მედიის ადვოკატირების კოალიცია სოციალურ ქსელში განცხადებას აქვეყნებს, სადაც კომუნიკაციების კომისიას (comcom) მოუწოდებს, დაიცვას სიტყვის თავისუფლება, მედიის დამოუკიდებლობის უფლება, არ გაატაროს "ოცნების" ინტერესები და შეასრულოს თავისი ფუნქცია პოლიტიკური გავლენის გარეშე.

"ქართულმა ოცნებამ" ტელეკომპანიების — "ფორმულას", "მთავარი არხისა" და "პირველის" წინააღმდეგ კომუნიკაციების კომისიაში საჩივარი შეიტანა. მმართველი პარია ტელეარხებს კონკრეტული ტერმინების გამოყენებას ედავება. მათი განცხადებით, ეს მედიის კონტროლის კიდევ ერთი მცდელობა.

გადაწყვეტილებას კომისია დღეს გამოაქვეყნებს.

"კომუნიკაციების კომისიას აქვს არჩევანი "ქართული ოცნების" ინტერესების სამსახურსა და საკუთარ მისიას შორის, რაც დამოუკიდებელი, პოლიტიკური გავლენისაგან თავისუფალი მარეგულირებლის ფუნქციას გულისხმობს.

კომისიას აქვს არჩევანი, დაიცვას ჟურნალისტური თავისუფლება საქართველოში.

"ქართული ოცნება" სხვადასხვა მეთოდით ცდილობს დამოუკიდებელი მედიის ხმის ჩახშობას. ტელეარხების "პირველის", "ფორმულას" და "მთავარი არხის" წინააღმდეგ კომუნიკაციების კომისიაში შესული საჩივარი მედიის დაცენზურების ერთ-ერთი ხერხია.

საჩივრის თაობაზე მიღებული გადაწყვეტილება კომუნიკაციების კომისიამ დღეს უნდა გამოაცხადოს.

პარტია ტელევიზიებს ტერმინების გამოყენებას ედავება — ანუ, რეალობის აღწერას უკრძალავს.

კომისიამ უნდა გაითვალისწინოს, რომ: საზოგადოებრივი ინტერესი პოლიტიკური ძალების კრიტიკულ შეფასებაზე უფრო მაღალია.

ქვეყანაში მიმდინარე მოვლენების საჯარო განხილვა დემოკრატიის საფუძველია და არა დასჯის საგანი.

მედიას უნდა ჰქონდეს უფლება ქვეყანაში მიმდინარე პროცესებს შესაბამისი დახასიათება და შეფასება მისცეს. ეს არის ჟურნალისტიკის არსი.

მოვუწოდებთ კომისიას, იყოს დამოუკიდებელი და თავისუფალი სიტყვის დამცველი!", — წერია განცხადებაში.