"ქალმა, რომელმაც გიოს საბუთებში ჩაიხედა და ნახა რომ 3-ში დაბადების დღე მაქვს, დედისთვის ეს საჩუქარი არ უნდა გაეკეთებინა, შვილის განაჩენი არ უნდა გამოეტანა" — ამის შესახებ სინდისის პატიმრის, გიორგი მინდაძის დედა ნანი წულაია Netgazet-თან ამბობს.

გიორგი მინდაძის დასკვნითი პროცესი თბილისის საქალაქო სასამართლოში დღეს, 15:00 საათზე გაიმართება.

"ვიცი, 3-ში საშინელი განაჩენი უნდა გამოუტანონ. დარწმუნებული ვარ, გალუსტაშვილი არ დამინდობს. ქალმა, რომელმაც გიოს საბუთებში ჩაიხედა და ნახა რომ 3-ში დაბადების დღე მაქვს, დედისთვის ეს "საჩუქარი" არ უნდა გაეკეთებინა, შვილის განაჩენი არ უნდა გამოეტანა, მაგრამ ნინოსნაირი ქალები მე ვერ შემაშინებენ, ვერავინ ვერ შემაშინებს იმიტომ, რომ გიორგი მინდაძის დედა ვარ, ვაჟკაცის!

მეამაყება ჩემი შვილი, ვიამაყებ ყოველთვის, მედგრად დავდგები, ვიბობოქრებ, გზას ვნახავ, არ გავჩერდები, ფეხშიშველა ვივლი, რკინის ქალამნებს ჩავიცვამ და ჩვენ ბიჭებს გავათავისუფლებ!

მე არ ვარ პოლიტიკოსი, არც ერთ პარტიას არ მივეკუთვნები, მე ვარ ქართველი რომელსაც გული სტკივა სამშობლოზე" — განაცხადა სინდისის პატიმრის დედამ, ნანი წულაიამ.

21 წლის გიორგი მინდაძე სამედიცინო უნივერსიტეტის სტუდენტია. ის პროევროპულ აქციებში აქტიურად მონაწილეობდა. ახალგაზრდა ბიჭი პირველ დეკემბერს ნათესავის სახლში პოლიციელზე თავდასხმის ბრალდებით დააკავეს.

გიორგი მინდაძეს ბრალი 353 პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს, კონკრეტულად, მას პიროტექნიკის სროლას ედავებიან. 21 წლის ახალგაზრდას 4-დან 7 წლამდე პატიმრობა ემუქრება.

ცნობისთვის, დღესვე თბილისის საქალაქო სასამართლოში სინდისის კიდევ ერთი პატიმრის, საბა ჯიქიას დასკვნითი პროცესიც იყო დაგეგმილი, თუმცა სხდომა გადაიდო. დღეს მოსამართლე სათათბიროდ არ გავა. მომდევნო სხდომა 10 ივნისს, 11:00-ზე გაიმართება.