ერთ-ერთი ყველაზე განხილვადი ჰოლივუდური წყვილი, მედიაში გავრცელებული ინფორმაციით, ცოტა ხნის წინ დაშორდა; პოპვარსკვლავ კეტი პერისა და კინოვარსკვლავ ორლანდო ბლუმის 9-წლიანი ურთიერთობა დასრულდა. ამ ამბავმა, როგორც ჩანს, მსახიობს კარლ იუნგის დანატოვარი მოაგონა. ბლუმმა თავის ინსტაგრამზე შვეიცარიელი ფსიქიატრისა და ფსიქოთერაპევტის რამდენიმე ციტატა გააზიარა. ციტატები "მარტოობის" ცნებასა და ბედნიერი ცხოვრების "სევდით" დაბალანსების საჭიროებას შეეხება.

"მარტოობის განცდას ის კი არ წარმოშობს, რომ გარშემო არავინ გყავს, არამედ ის, რომ შენთვის მნიშვნელოვან საკითხებზე ვერავის დაელაპარაკები", — ამ ციტატით იხსნება ბლუმის "ინსტაგრამკარუსელი".

პოსტში გამოტანილი იუნგის კიდევ ერთი ციტატა ამბობს, რომ "ნებისმიერი დამოკიდებულება ცუდია, იქნება ეს ნარკოტიკი, ალკოჰოლი, მორფინი თუ იდეალიზმი".

26 ივნისს, როცა ამერიკულ მედიაში ბლუმისა და პერის დაშორების ამბავი გავრცელდა, ინგლისელი მსახიობი მარტო გაემგზავრა იტალიაში ლორენ სანჩესისა და ჯეფ ბეზოსის ქორწილზე დასასწრებად.

ბლუმმა და პერიმ ერთმანეთი 2016 წლის ოქროს გლობუსის დაჯილდოების ცერემონიის შემდეგ გამართულ წვეულებაზე გაიცნეს. რამდენიმე თვის შემდეგ მათ ურთიერთობა ინსტაგრამზე გაასაჯაროვეს, შემდეგ კი კანის კინოფესტივალსაც ერთად დაესწრნენ. ერთწლიანი ურთიერთობის შემდეგ, წყვილი მცირე ხნით დაშორდა, მაგრამ 2019 წლის თებერვალში, ვალენტინობის დღეზე, დაინიშნნენ. ბლუმს და პერის 2020 წელს შვილიც შეეძინათ.