13 სექტემბერს გავრცელებულ ჩანაწერებზე სახალხო დამცველი ნინო ლომჯარია სტრასბურგის სასამართლოსთვის მიმართვასაც განიხილავს. მისივე თქმით, ეს ერთ-ერთი გამოსავალია. ომბუდსმენი, ასევე, აღნიშნავს, რომ მოქალაქეების მიმართ მოსმენა და მიყურადება სისტემური დანაშაულია.

"საერთაშორისო სასამართლოსადმი მიმართვაც შეიძლება განიხილოს საქართველოს მოქალაქეებმა, ჩვენ ამ საკითხზე ვმუშაობთ და იგივე სტრასბურგის სასამართლოში მიმართვის შესაძლებლობაც, ვფიქრობ, არის ერთ-ერთი გამოსავალი", — თქვა ლომჯარიამ.

მისივე თქმით, არ აქვს მოლოდინი, რომ გამოძიება ობიექტურად და ეფექტურად მოხდეს.

"ადგილი ჰქონდა სისტემურ დანაშაულს, უკანონო მიყურადებას და მოსმენებს საქართველოს მოქალაქეების. ამაზე საჭიროა სისტემური პასუხი. რაც შეეხება გამოძიებას, რა თქმა უნდა, ის უნდა დაწყებულიყო და ფორმალურად უნდა დაიწყოს, თუმცა პირადად მე ნამდვილად არ მაქვს, გულწრფელად რომ გითხრათ, იმის მოლოდინი, რომ ამ დანაშაულის გამოძიება მოხდება ობიექტურად ან ეფექტურად. რადგან არცერთი მსგავსი, თუნდაც უფრო მცირე მასშტაბის მსგავს დარღვევებზე გამოძიებას არ ჰქონია ეფექტური რეაგირება", — განაცხადა სახალხო დამცველმა.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ათასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.

გაიგეთ მეტი გავრცელებულ ჩანაწერებზე: