ჯანდაცვის მინისტრის მოადგილის, თამარ გაბუნიას განცხადებით, დღეისთვის საქართველოში მასწავლებლების 50%-ზე მეტი სრულადაა ვაქცინირებული, რაც ცუდი მაჩვენებელი არ არის, მაგრამ არასაკმარისია. მისი თქმით, მნიშვნელოვანია, ბავშვები საკლასო გარემოს დაუბრუნდნენ, რისთვისაც ყველაზე ეფექტური და სწრაფი საშუალება ამ სფეროში მომუშავე მეტი ადამიანის ვაქცინაციაა, იქნება ეს მასწავლებელი თუ სხვა პერსონალი.

"ზოგადად მასწავლებლების ვაქცინაციის მაჩვენებელი არ არის ცუდი — დაახლოებით, 50%-ს აღემატება. ერთხელ ვაქცინირებული უფრო მეტია. ზოგიერთ რეგიონში კიდევ უფრო უკეთესი მაჩვენებელია, რაც ბუნებრივია, კარგია, მაგრამ სრულად საკმარისი არ არის, რადგან უმრავლესობა უნდა იყოს ვაქცინირებული იმისთვის, რომ ჩვენ ჩავთვალოთ, რომ სკოლა ან რომელიმე სხვა გარემო არის უსაფრთხო. რა თქმა უნდა, გრძელდება, მასწავლებლების ორგანიზებული აცრის პროცესი", — აცხადებს გაბუნია რუსთავი 2-ის ეთერში.

მინისტრის მოადგილის თქმით, თუ მომდევნო 3 კვირის განმავლობაში სასწავლო პერსონალი აქტიურად აიცრება, ოქტომბრისთვის უკვე კარგი პირობები იქნება როგორც სწავლის შეუფერხებლად გაგრძელებისთვის, ასევე სამომავლოდ ინფექციის გავრცელების შეფერხებისთვისაც.

"სკოლის, უნივერსიტეტის გარემო, ძალიან დატვირთული, აქტიური გარემოა, ამდენად, იქ ინფექციის გადაცემის რისკი, თუ ძალიან ზედმიწევნით, ზუსტად არ დავიცავით წესები, ბუნებრივია, არსებობს. რა თქმა უნდა, ჩვენ, ერთი მხრივ, გვინდა, რომ სწავლა დაუბრუნდეს სასკოლო გარემოს და ეს არის ჩვენი მიზანი და ვფიქრობთ, ამის კარგი პირობები გარკვეულწილად იქნება უკვე ოქტომბრის დასაწყისისთვის, მაგრამ შემდეგ შენარჩუნებაა მნიშვნელოვანი. ასე რომ, თუ ჩვენ მომდევნო 3 კვირას გამოვიყენებთ იმისთვის, რომ პედაგოგიური პერსონალი და სტუნდეტები აიცრან, რა თქმა უნდა, ეს ბევრად უფრო საიმედო პროგნოზის საშუალებას მოგვცემს, როგორც სწავლის შეუფერხებელი გაგრძელების თვალსაზრისით, ასევე, ინფექციის სამომავლოდ გავრცელების შეფერხების თვალსაზრისით", — აღნიშნავს გაბუნია.

საქართველოში 4 სხვადასხვა ვაქცინა, ფაიზერი, სინოფარმი, სინოვაკი და ასტრაზენეკა არის შემოტანილი. ვაქცინაცია შეუძლია ყველა მსურველს, 16 წელს ზევით. ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაცის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.

გაიგეთ მეტი: როგორ უნდა მიხვიდეთ ასაცრელად, როცა საზოგადოებრივი ტრანსპორტი შეზღუდულია — მარშრუტები