რუსეთის საგარეო საქმეთა მინისტრის, სერგეი ლავროვის განცხადებით, საქართველოსთან ურთიერთობის აღსადგენად მზად არიან. როგორც პროსახელისუფლებო მედია RIA წერს, ოკუპანტი ქვეყნის მინისტრმა აღნიშნა, რომ ნებისმიერ დროს გადადგამენ ამ ნაბიჯს, თუ საქართველოს სურს "მეზობელთან ნორმალურად ცხოვრება".

ლავროვის მტკიცებით, მაშინ, როცა საქართველომ რუსეთის მოქალაქეებისთვის უვიზო რეჟიმი მიიღო, სურდათ, საპასუხოდ იგივე ნაბიჯი გადაედგათ. მისი მტკიცებით, თავდაპირველად სიტუაციას აკვირდებოდნენ და დაახლოებით წელიწადნახევრის წინ მზად იყვნენ, რომ საქართველოსთან უვიზო რეჟიმზე განეცხადებინათ, თუმცა "უხეში პროვოკაციის" გამო გადაიფიქრეს. "უხეშ პროვოკაციას" კი ლავროვი არა რუსი კომუნისტი დეპუტატის, სერგეი გავრილოვის პარლამენტის თავმჯდომარის სკამში ჩაჯდომას, არამედ ხალხის პროტესტს უწოდებს.

"თუ საქართველოს ნამდვილად სურს, არ გაათამაშოს რუსული კარტი დასავლეთის მფარველობის შესანარჩუნებლად და სურს, ჩვენთან, როგორც მეზობელთან ნორმალური ცხოვრება, ჩვენ ამისთვის მზად ვართ ნებისმიერ დროს", — განაცხადა ლავროვმა.

საქართველოსთან ურთიერთობაზე 28 ივლისს ისაუბრა რუსეთის ფედერაციის საერთაშორისო საქმეთა კომიტეტის ხელმძღვანელმა, გრიგორი კარასინმაც. მან აღნიშნა, რომ რუსეთი ავიამიმოსვლის აღდგენის საკითხის განხილვისთვის მზადაა. აღსანიშნია, რომ ავიამიმოსვლა სწორედ რუსეთმა შეაჩერა