თალიბანმა ავღანელ ქალებს სამსახურებიდან "დრობითი დასვენება" და სახლში დარჩენა მოსთხოვა, რადგან მებრძოლები მათ პატივისცემაში არ არიან დატრენინგებული. ამის შესახებ თალიბანის სპიკერმა 24 აგვისტოს გამართულ პრესკონფერენციაზე განაცხადა.

როგორც თალიბანის სპიკერმა აღნიშნა, ქალებს ამ მითითებას მათივე უსაფრთხოების გამო აძლევენ. როგორც ის აღნიშნავს, ეს არის "აუცილებელი ზომა", რადგან "მებრძოლები არ არიან გაწვრთნილი მათი პატიისცემისთვის" და "ღმერთმა არ ქნას, დაზარალდნენ".

მისივე თქმით, ეს იქნება დროებითი ზომა და ჯგუფს მისცემენ დროს, რომ ეს საკითხი მოაგვაროს.

"ჩვენ მოხარული ვართ, რომ ისინი შედიან შენობებში, მაგრამ ჩვენ გვინდა დავრწმუნდეთ, რომ მათ საფრთხე არ დაემუქრებათ. ამიტომ ჩვენ ვთხოვეთ მათ, სამსახურიდან დაისვენონ მანამ, სანამ სიტუაცია ნორმალურ მდგომარეობას არ დაუბრუნდება და ქალებთან დაკავშირებული საკითხები მოგვარდება. როგორც კი ეს გამოცხადდება, ისინი სამსახურებში დაბრუნებას შეძლებენ", — განაცხადა ზაბიჰულაჰ მუჯაჰიდმა.

1996-2001 წწ-ში, როდესაც ავღანეთს თალიბანი აკონტროლებდა, ქალებს მუშაობა აუკრძალა და ბურკის ტარება დაავალდებულა. თალიბანის მიერ ზალაუფლების აღებისთანავე ავღანეთში გაჩნდა შიში, რომ იგივეს გააკეთებდნენ და მიუხედავად იმისა, რომ თავიდან ამას უარყოფდნენ, ნელ-ნელა სხვადასხვა მიზეზით ამ წესებს ამკვიდრებენ.

ავღანეთიდან აშშ-ის ძალების გასვლის შემდეგ, თალიბანმა მალევე შეძლო და ქაბულიც აიღო – პრეზიდენტი გაიქცა, თალიბებმა ძალაუფლება მოიპოვეს. მათ ხელისუფლების ყველა წარმომადგენლისათვის საყოველთაო "ამნისტია გამოაცხადეს" და მთავრობაში ქალები მიიწვიეს. მათი მტკიცებით, ხალხს შეუძლია, დაუბრუნდეს თავის რუტინულ ყოველდღიურობას, თუმცა ამის ფონზე, დევნიან ქუჩაში დამოუკიდებლობის დღის აღსანიშნავად გამოსულ მოქალაქეებს, ქალებს, რომლის ჩაცმის სტილიც არ მოსწონთ, ჟურნალისტებს. ბოლო დღებში თალიბებმა ათამდე მოკლეს და არაერთი დაჭრეს, მათ შორის, ისინი, ვინც ქვეყნიდან გაქცევას ცდილობდნენ. ბოლო დღეებში ავღანეთში გარდაცვლილთა რაოდენობის შესახებ ზუსტი მონაცემები არ არსებობს და მედიაში სხვადასხვა მონაცემი ვრცელდება. ავღანეთის ხელისუფლების ნაწილი, რომელსაც სათავეში ვიცე-პრეზიდენტი ამრულაჰ სალეჰი უდგას, დანებებას არ აპირებს. ის სამხედრო მეთაურ აჰმად მასუდთან ერთად მომხრეებს პანჯშირის ხეობაში კრებს. ცოტა ხნის წინ ცნობილი გახდა, რომ თალიბანის ხელმძღვანელობამ ასობით მებრძოლი პანჯშირის ხეობის ასაღებად გაგზავნა. თუმცა, შედეგების შესახებ ჯერეჯრობით არაფერია ცნობილი. საერთაშორისო საზოგადოებამ კი თალიბანისთვის ეკონომიკური სანქციების დაწესება დაიწყო.