On.ge-ს ჟურნალისტს, თამთა კახაბერიძეს დაზარალებულის სტატუსი მიანიჭეს. მას 5 ივლისს ძალადობრივ კონტრაქციაზე თავს დაესხნენ და ჟურნალისტურ საქმიანობაში ხელი შეუშალეს.

ჟურნალისტის ინტერესებს ახალგაზრდა იურისტთა ასოციაცია იცავს. ორგანიზაციის იურისტი, ბექა თაკალანძე განმარტავს, რომ დაზარალებულად ცნობა მისი განცხადების საფუძველზე მოხდა.

"დაზარალებულად ცნობას კონკრეტული ვადა არ აქვს, კანონში წერია, რომ ან საკუთარი ინიციატივით უნდა ცნოს პროკურორმა ან განცხადების მიმართვის საფუძველზე. ვინაიდან თავისი ინიციატივით არ ცნეს, ამიტომაც მივმართე. ვფიქრობდი, რომ არსებობდა დაზარალებულად ცნობის სამართლებრივი საფუძვლები: ჟურნალისტს პროფესიულ საქმიანობაში ხელი შეეშალა, რაც პროკურატურამ გაიზიარა", — განაცხადა მან.

დაზარალებულად ცნობის დადგენილებაში წერია, რომ 5 ივლისს ძალადობრივი და ჰომოფობიური ჯგუფების მიერ განხორციელებული ქმედებებით თამთა კახაბერიძეს ფიზიკური და მორალური ზიანი მიადგა.

"რუსთაველის გამზირზე, საქართველოს პარლამენტის შენობის მიმდებარედ შეირაღებული პირთა ჯგუფი, წინასწარი შეთანხმებით, ჯგუფურად, ჟურნალისტურ საქმიანობაში ხელშეშლის მიზნით, თავს დაესხნენ On.ge-ს ჟურნალისტ თამთა კახაბერიძეს და აიძულებდნენ მას შეეწყვიტა პროფესიული საქმიანობა, მათ შორის იმ მიზნით, რომ არ განეხორციელებინათ მოძალადე ჯგუფების მიერ ჩადენილი ძალადობრივი ქმედებების ამსახველი კადრების მოპოვება და გავრცელება", — ნათქვამია დადგენილებაში.

On.ge-ს ჟურნალისტი მედიის ერთ-ერთი წარმომადგენელი იყო, რომელიც 5 ივლისს ძალადობრივ კონტრაქციაზე სამსახურებრივი საქმიანობის დროს დაზარალდა. მას გადაღების საშუალება არ მისცეს, მოძალადეებმა ხელი აუქნიეს და მუშტის მოღერებით აიძულებდნენ, რომ გადაღება შეეწყვიტა.

"ტელეფონი სელფის ჯოხზე მქონდა დამაგრებული და ვიღებდი. უცებ ვიღაც ბიჭი მოტრიალდა და ხელი ამიქნია, ძლივს დავიჭირე ტელეფონი. მეგონა, შემთხვევით მოუხდა ხელი, რადგან არ ველოდი, რომ მე დამარტყამდა. არაუშავს-მეთქი, ვუთხარი. მთავარი ამბავი ის არის, რომ ტელეფონზე პრაიდის სტიკერი მქონდა დაკრული და ეს არ მახსოვდა. სავარაუდოდ, ამაზე გაღიზიანდნენ. ორი ბიჭი იწევდა, მოხსენიო, მუშტი მომიღერა. ჩანს კადრებშიც, მუშტით მოდის და პოლიცია აჩერებს, მაგინებს, რაღაც საშინელებებს მეძახის. ვერ ვხდებოდი, რა უნდოდა. რამდენჯერმე გავიგე, მოხსენიო რომ მითხრა, მაგრამ ვერ ვხდებოდი, რა უნდა მომეხსნა", — იხსენებს კახაბერიძე.

5-6 ივლისს ჰომოფობიურ და ძალადობრივი ჯგუფების თავდასხმის შედეგად 50-ზე მეტი ადამიანი დაშავდა, მათგან უმრავლესობა მედიის წარმომადგენელია. ძალადობრივი ჯგუფები თავს დაესხნენ თბილისი პრაიდის, სირცხვილიასა და ადამიანის უფლებათა ცენტრის ოფისებსაც. 11 ივლისს, აქციაზე ნაცემი TV პირველის ოპერატორი, ლექსო ლაშქარავა გარდაიცვალა.

5-6 ივლისის ძალადობას წინ უძღოდა ქართული ოცნების ლიდერების განცხადებები იმაზე, რომ ღირსების მარშს მიზანშეწონილად არ მიიჩნევენ. 5 ივლისს, როცა უკვე დაწყებული იყო ძალადობა, ღარიბაშვილმა ისევ თბილისი პრაიდი გააკრიტიკა, რამდენიმე დღეში კი გაიმეორა ჰომოფობიური ჯგუფების გზავნილი პროპაგანდის შესახებ.

ჰომოფობიური და ძალადობრივი კონტრაქციის ორგანიზატორები ამ დრომდე არ დაუკავებიათ.