ამერიკის შეერთებული შტატების პრეზიდენტი, დონალდ ტრამპი გერმანიის კანცლერ ანგელა მერკელს რჩევას სთხოვს რუსეთის პრეზიდენტთან ურთიერთობებისთვის. ამერიკის ოფიციალური პირები ამბობენ, რომ ტრამპი და მერკელი ბოლო თვეების უთანხმოების შემდეგ, შემდეგ კვირას ერთმანეთს შეხვდებიან. ამის შესახებ ინფორმაციას როიტერი ავრცელებს.

როიტერის ინფორმაციით, მერკელი თეთრ სახლში სამშაბათს მივა და ერთობლივ პრესკონფერენციაზე ისაუბრებენ, რა იქნება მათი პირველი პირისპირ შეხვედრის თემა. ტრამპის ადმინისტრაციის წარმომადგნელებმა ჟურნალისტებს უთხრეს, რომ შეხვედრის სავარაუდო თემები თავდაცვის საკითხების დაფინანსება (ნატო), უკრაინის კონფლიქტი, სირიელი ლტოლვილები და სხვა საკითხები იქნება.

2016 წელს, საპრეზიდენტო კამპანიის განმავლობაში, ტრამპი ხშირად აკრიტიკებდა მერკელს ლტოლვილების მიმართ ღია კარის პოლიტიკის გამო. ტრამპის დაპირება კი იყო, რომ შეერთებულ შტატებში გამკაცრდებოდა კონტროლი. მერკელი ერთ-ერთია მათ შორის, ვინც აკრიტიკებს ტრამპის პოლიტიკას შვიდი მუსლიმი ერისთვის აშშ-ში შესვლის აკრძალვაზე.

ტრამპის ადმინისტრაციის თანამშრომელმა, ანონიმურად დარჩენის პირობით, განაცხადა, რომ მისი აზრით, მერკელის და ტრამპის შეხვედრა მეგობრული იქნება. ამავე ადმინისტრაციის სხვა წარმომდგენელი ამბობს, რომ პრეზიდენტი დაინტერესებულია მოისმინოს როგორია კანცლერის გამოცდილება პუტინთან ურთიერთობაში. ტრამპი ასევე დაინტერესდება, რა როლი შეიძლება ჰქონდეს ამერიკის შეერთებულ შტატებს რუსეთისა და უკრაინის კონფლიქტის მოგვარებაში.