11 წლიანი თავგადასავალი დასასრულს უახლოვდება — The Walking Dead-ის ფინალური სეზონის ტრეილერის მიხედვით, წინ პოსტაპოკალიფსურ სამყაროში ნამდვილად დაძაბული და საინტერესო მოგზაურობა გველის.

სერიალის მე-11 სეზონი 24 ეპიზოდს მოიცავს და სამ 8-ეპიზოდიან ნაწილად იყოფა. პირველი 8 ეპიზოდის პრემიერა AMC-ზე 22 აგვისტოს შედგება. ბოლო სეზონი 2022 წელს დასრულდება. სერიალში ძველ, კარგად ნაცნობ პერსონაჟებთან ერთად ახალ სახეებს — ლაილა რობინსისა და ჯოშ ჰამილტონის პერსონაჟებსაც ვიხილავთ.

მიუხედავად იმისა, რომ სერიალი დასასრულს უახლოვდება, The Walking Dead ერთგულ მაყურებელთან გამომშვიდობებას ჯერ არ აპირებს. 2023 წლისთვის ახალი სპინოფ სერიალია დაგეგმილი, რომლის მთავარი გმირებიც დერილ დიქსონი და კეროლ პელეტი იქნებიან.

ოქტომბერში სპინოფ სერიალების Fear The Walking Dead-ის მე-7 სეზონისა და The Walking Dead: World Beyond-ის მეორე სეზონის პრემიერაც შედგება. აღსანიშნავია ისიც, რომ ჯეფრი დინ მორგანის თქმით, სერიალის შემქმნელების მისი პერსონაჟის — ნეგანის შესახებ ახალი სპინოფ სერიალის გადაღებას განიხილავენ.