პარტია ლელო საქართველოსთვის პრემიერმინისტრისა და შინაგან საქმეთა მინისტრის დაუყოვნებლივ გადადგომას მოითხოვს. სწორედ მათ აკისრებენ პასუხისმგებლობას 5 ივლისის ძალადობრივ კონტრაქციაზე სასტიკად ნაცემი TV პირველის ოპერატორის, ალექსანდრე ლაშქარავას გარდაცვალების ფაქტზე.

"პრემიერმინისტრის განცხადებებმა ურთულეს ვითარებაში წამქეზებლის როლი შეასრულა და შსს-მ ვერ ან არ იმოქმედა ძალადობის აღსაკვეთად. მოვითხოვთ ფაქტზე უსწრაფეს და სამართლიან გამოძიებას, დამოუკიდებელ ექსპერტიზას და გამოძიების დროს მინიმუმ ეს თანამდებობის პირები არ უნდა იყვნენ დაკავებულ პოსტებზე.

არავის შევარჩენთ უდანაშაულო ადამიანის ტრაგიკულ გარდაცვალებას და არ შევარჩენთ ვიწროპოლიტიკური ინტერესების გამო ადამიანების შეწირვას და სახელმწიფოს ჩამოშლის მცდელობას", — ვკითხულობთ პარტიის მიერ გავრცელებულ განცხადებაში.

პარტიაში აცხადებენ, რომ მოვლენები, რის გაშუქებასაც ალექსანდრე ლაშქარავა შეეწირა რუსული სცენარის ნაწილია.

"ღრმა მწუხარებას გამოვთქვამთ ტვ პირველის ოპერატორის ლექსო ლაშქარავას გარდაცვალების გამო. მოვლენები, რის გაშუქებასაც ლექსო შეეწირა რუსული სცენარის ნაწილია საქართველოში, რომლის მიზანი ქვეყანაში სამოქალაქო დაპირისპირების ინსპირირება და სახელმწიფოს ჩამოშლაა. ამ სცენარს ჰყავს ბრმა შემსრულებლები, მაგრამ სამწუხაროდ ჰყავს დამკვეთები და დამგეგმავები საქართველოს ხელისუფლების უმაღლეს ეშელონებში", — აცხადებენ პარტიაში.

დღეს, 11 ივლისს გარდაიცვალა TV პირველის ოპერატორი, ალექსანდრე ლაშქარავა. იგი ერთ-ერთია იმ ათობით მედიის წარმომადგენელს შორის, რომელსაც 5 ივლისს ძალადობრივი კონტრაქციის მონაწილეები ფიზიკურად გაუსწორდნენ. ცემის შედეგად მას ჰქონდა სახის ძვლების მოტეხილობა თვალის გარშემო, ტვინის შერყევა და დაჟეჟილობები. იგი რამდენიმე დღე საავადმყოფოში იმყოფებოდა და შემდეგ სახლში გაეწერა. დღეს დილით, იგი საკუთარმა დედამ იპოვა გარდაცვლილი.

გაიგე მეტი: