შინაგან საქმეთა სამინისტრომ "ქურდული სამყაროს" წევრობის, ქურდული სამყაროს საქმიანობის მხარდაჭერისა და კანონიერი ქურდისთვის მიმართვის ბრალდებით 25 პირი დააკავეს, ამავე ბრალდებით სასჯელაღსრულების დაწესებულებებში ბრალი დამატებით 4 პირს წარედგინა. დაკავებულებს შორის არიან 1987 წელს დაბადებული ს.ტ. მეტსახელად "ყასაბიჩი", 1990 წელს დაბადებული თ.ტ. მეტსახელად "ჩიჟიკა", 1998 წელს დაბადებული ა.მ. მეტსახელად "წიწაკა", 1988 წელს დაბადებული გ.ვ. მეტსახელად "მღვდელოვიჩი", 1990 წელს დაბადებული ა.ა. მეტსახელად "ბოთე", 1979 წელს დაბადებული გ.ჯ. მეტსახელად "ხორთუმა" და სხვები.აღნიშნულზე ინფორმაციას შსს ავრცელებს.

"შინაგან საქმეთა სამინისტროს ქვემო ქართლის პოლიციის დეპარტამენტისა და ქვემო ქართლის საოლქო პროკურატურის რუსთავის რაიონული სამმართველოს თანამშრომლებმა ერთობლივად, ექვსთვიანი კომპლექსური ოპერატიული და საგამოძიებო ღონისძიებების შედეგად: რუსთავში, თბილისში, გორში, ქარელში, ხონში, ამბროლაურში, ბოლნისში, თეთრიწყაროში, დმანისში, ლაგოდეხსა და გარდაბანში "ქურდული სამყაროს" წევრობის, ქურდული სამყაროს საქმიანობის მხარდაჭერის და კანონიერი ქურდისთვის მიმართვის ბრალდებით 25 პირი დააკავეს. ამავე ბრალდებით სასჯელაღსრულების დაწესებულებებში ბრალი წარედგინება დამატებით 4 პირს", — აცხადებს უწყება.

შსს-ს ცნობით, აღნიშნული პირები აღიარებდნენ ე.წ. ქურდულ სამყაროს და აქტიურად მონაწილეობდნენ სხვადასხვა დანაშაულებრივ საქმიანობაში, სისტემატიურად მონაწილეობდნენ ქურდულ გარჩევებში, რომელიც შეეხებოდა პირის ქმედების შეფასებას, დავის გადაწყვეტას, სტატუსის შეცვლას, ქურდული სამყაროს საქმიანობასთან დაკავშირებულ საკითხების განხილვას, რითაც ცდილობდნენ ფინანსური სარგებელი მიეღოთ და მოეპოვებინათ უპირატესობა, კრიმინალური გავლენა და ძალაუფლება.

"წარსულში მრავალგზის ნასამართლევ პირებს მოწყობილი ჰქონდათ სპეციალური სივრცე, სადაც ახდენდნენ კრიმინალურ გარჩევებს, აორგანიზებდნენ და გეგმავდნენ სხვადასხვა დანაშაულებს. გამოძიებით დადგენილია, რომ ბრალდებულებს კავშირი ჰქონდათ საზღვარგარეთ მყოფ 9 კანონიერ ქურდთან, მათ შორის არიან: კახა შუშანაშვილი, შოთა ასათიანი, ნამიქ სალიფოვი, ლუკა ასანიძე, პაატა ბაქრაძე, დავით ქურასბედიანი და სხვა ე.წ. კანონიერი ქურდები", — აცხადებენ უწყებაში.

შინაგან საქმეთა სამინისტროს ინფორმაციით, გამოძიება საქართველოს სისხლის სამართლის კოდექსის 223-ე პრიმა მუხლის 1-ლი და მე-2 ნაწილებით, 223-ე პრიმა-3 და 223-ე პრიმა-4 მუხლებით მიმდინარეობს.