ჯანდაცვის მინისტრის მოადგილის, თამარ გაბუნიას განცხადებით, ახალციხის კლინიკაში გარდაცვლილი ექთნის, მეგი ბაქრაძის საქმეზე კლინიკის 2 თანამშრომელი გაათავისუფლეს.

"რა პირობით მოხდა გათავისუფლება, ეს არის დროებითი ხელშეკრულების შეჩერება თუ რაიმე სხვა პირობა, ამასთან დაკავშრებით ინფორმაცია მე დაზუსტებული არ მაქვს, თუმცა საბჭოს რეკომენდაცია ეს ნამდვილად იყო.

ამ შემთხვევაში იყო საუბარი იმ ექიმებზე, ვინც იყო ჩართული პროცესში და ვის მიმართაც დაისვა ეს, შეიძლება, ორი ან სამი კოლეგა. ნაწილი იქ აღარ მუშაობდა, იქ ვინც დარჩა ამათთან მიმართებაში ნამდვილად არაეთიკურად ჩაითვალა ის საკითხი, რომ მიუხედავად ასეთი ტიპის პროცედურული გადაცდომებისა, კოლეგები აგრძელებდნენ მუშაობას იგივე დაწესებულებაში რეაგირების გარეშე. ვფიქრობ, ორი შემთხვევა იყო ასეთი", — თქვა მან.

ახალციხელი ექთანი, რომელიც პირველ საუნივერსიტეტო კლინიკაში მკურნალობდა, 19 მარტს გარდაიცვალა. საქმეზე შინაგან საქმეთა სამინისტრომ გამოძიება სისხლის სამართლის კოდექსის 116-ე მუხლით დაიწყო, რაც გაუფრთხილებლობით სიცოცხლის მოსპობას გულისხმობს.

18 მარტს გავრცელდა ინფორმაცია, რომ ახალციხეში ექთანი AstraZeneca-ს ვაქცინის გაკეთების შემდეგ კომაში ჩავარდა. მოგვიანებით გაირკვა, რომ მას სავარაუდოდ, ანაფილაქსიური რეაქცია ჰქონდა.

ბრიფინგზე ჯანდაცვის მინისტრის მოადგილემ და NCDC-ის დირექტორმა აღნიშნეს, რომ, შესაძლოა, ეს იყოს ვაქცინის გვერდითი ეფექტი, თუმცა ამის დასადგენად მიმდინარეობს კვლევა. ამის შემდეგ ჯანდაცვის სამინისტროში ექსპერტებმა AstraZeneca-ს ვაქცინის სამომავლო გამოყენებაზე იმსჯელეს და გადაწყვიტეს, რომ ამ პრეპარატით აცრა არ შეჩერდება.

გაბუნიამ აღიშნა ისიც, რომ AstraZeneca-ს ვაქცინას მსგავს გვერდით რეაქცია აქვს უკვე დაფიქსირებული — ბრიტანეთის მონაცემებით, 5 მილიონი შემთხვევიდან 41 იყო მსგავსი ანაფილაქსიური გვერდითი რეაქცია. მანვე აღნიშნა, რომ ვაქცინის რისკი მის სარგებელთან შედარებით ყოველთვის ნაკლებია.

ამავე თემაზე: