საქართველოში ევროკავშირის ელჩი, კარლ ჰარცელი, მიიჩნევს, რომ უზენაეს სასამართლოში მოსამართლეების დანიშვნის საკითხზე აჩქარება "ცუდი სტარტი იქნება ამ ხელშეკრულების განხორციელების პროცესში". ამის შესახებ მან დღეს ჟურნალისტებთან განაცხადა და იმედი გამოთქვა, რომ აღნიშნულ მოსაზრებას პარლამენტი გაითვალისწინებს.

"ჩვენ, მე და კოლეგებმა აშშ-დან და ევროპის საბჭოდან ამასთან დაკავშირებით პოზიცია უკვე გამოვთქვით — სჯობს ცოტა შენელება, არ არის საჭირო სიჩქარე და ნაჩქარევად მიღებული გადაწყვეტილებები დანიშვნებთან დაკავშირებით. ასევე, ამაში გათვალისწინებული უნდა იყოს ვენეციის კომისიის გადაწყვეტილება, რათა ყველა კანდიდატის მიმართ ერთნაირი მიდგომა იყოს. იმედი მაქვს, პარლამენტში ამის განხილვა ასეც მოხდება. ამ საკითხის შესწავლა უნდა გაგრძელდეს და ვიმედოვნებ, არ აჩქარდებიან, რადგან ეს სიჩქარე ცუდი სტარტი იქნება ამ ხელშეკრულების განხორციელების პროცესში.

ყველაზე დიდი მონაპოვარი ისაა, რომ დისკუსიები გაგრძელდა და ოპოზიცია დაბრუნდა პარლამენტში. ეს ძალიან მნიშვნელოვანია საქართველოში დემოკრატიის განვითარებისთვის, რადგან უამრავი გამოწვევა არსებობს. იმედი მაქვს, რომ შეთანხმების სულისკვეთება გარძელდება", — განაცხადა ჰარცელმა [რუსთავი 2-ის თარგმანი].

დღეს მმართველი პარტიის თავმჯდომარემ, ირაკლი კობახიძემ, განაცხადა, რომ მოსამართლეთა დანიშვნა არ შეჩერდება.

17 ივნისს იუსტიციის უმაღლესმა საბჭომ პარლამენტს უზენაესი სასამართლოს მოსამართლეობის 9 კანდიდატს წარუდგინა. კერძოდ, გიორგი გოგიაშვილი, გოჩა აბუსერიძე, ლევან თევზაძე, ქეთევან მესხიშვილი, გიორგი შავლიაშვილი, რევაზ ნადარაია, ბიძინა სტურუა, ეკა ზარნაძე, ლაშა გოჩიაშვილი. საბჭოს არამოსამართლე წევრი, ნაზი ჯანეზაშვილი On.ge-სთან დადებითად აფასებს ქეთი მესხიშვილისა და ეკა ზარნაძის წარდგენას, თუმცა ამბობს, რომ ამ მოდელით უმრავლესობაში კვლავ ე.წ. კლანი რჩება, კარგი მოსამართლეები კი — უმცირესობაში.

აღსანიშნავია, რომ შარლ მიშელის დოკუმენტის ერთ-ერთი მთავარი პუნქტი სასამართლო რეფორმას ეხება. შეთანხმების მიხედვით, არსებული წესით უზენაეს სასამართლოში მოსამართლეების დანიშვნისგან თავი უნდა შეიკავონ. ამასთან, მითითებულია, რომ პარლამენტს უნდა წარედგინოს უზენაეს სასამართლოში დანიშვნის კანონპროექტი, სადაც გათვალისწინებული იქნება 2019 წელს გამოქვეყნებული ვენეციის კომისიის დასკვნა, ღია კენჭისყრა იუსტიციის უმაღლეს საბჭოში და ამ უკანასკნელის ნომინაციების დასაბუთების აუცილებლობა.

ასევე, უნდა მოხდეს იუსტიციის უმაღლესი საბჭოს არსებითი რეფორმა გამჭვირვალობის, მთლიანობის და სანდოობის მიზნით, მათ შორის დანიშვნებში, შეფასებებში, დაწინაურებებში, ტრანსფერებში, შედგენილია ზომები და საჩივრები, რომლებიც წარედგინება ვენეციის კომისიას და ეუთო/დემოკრატიული ინსტიტუტებისა და ადამიანის უფლებათა ოფისს (ODIHR) მოსაზრებისთვის და რეკომენდაციებისთვის, რაც სრულად უნდა შესრულდეს.