სომხეთში საპარლამენტო არჩევნების დღეს ოპოზიციის ერთ-ერთი ლიდერის, არმენ ბაბაჯანიანის მანქანის საქარე მინაზე ტყვიის ნაკვალევი აღმოაჩინეს. ამსახველი ფოტოები ბაბაჯანიანმა თავად გამოაქვეყნა და განაცხადა, რომ ამ დროს მანქანაში არც ის და არც სხვა ვინმე იმყოფებოდა.

ფოტო: არმან ბაბაჯანიანი / FB

რადიო თავისუფლების სომხური ბიუროს ინფორმაციით, პარტია რესპუბლიკისთვის და დემოკრატების ბლოკის ლიდერმა, ბაბაჯანიანმა განაცხადა, რომ დამნაშავე იქვე მდებარე კამერამ გადაიღო, თუმცა მას ნიღაბი და კაპიუშონი ჰქონდა, ამიტომ იდენტიფიცირება რთულია.

ბაბაჯანიანის ბლოკმა ეს შემთხვევა პოლიტიკურ ანგარიშსწორებად შეაფასა მათ წინააღმდეგ, ვისაც ბევრი ამომრჩეველი ჰყავს. ისინი მოთხოვენ, დამნაშავე დროულად იპოვონ და კანოის მთელი სიმკაცრით დასაჯონ.

დღეს, 20 ივნისს სომხეთში ვადამდელი საპარლამენტო არჩევნები იმართება. ხმის მიცემა ადგილობრივი დროით, დილის რვა საათზე დაიწყო 2 000-მდე საარჩევნო პუნქტში და საღამოს 8 საათამდე გაგრძელდება.

არჩევნებში 21 პარტია და 4 ბლოკი მონაწილეობს. პარლამენტში მოსახვედრად პარტიებმა 5%-იანი ბარიერი უნდა გადალახონ, ბლოკებმა კი 7%-იანი.

პრემიერმინისტრობის კანდიდატებს შორისაა ამჯამად მოვალეობის შემსრულებელი, ყოფილი პრემიერი ნიკოლ ფაშინიანი. ადგილობრივი მედიის ინფორმაციით, მმართველი პარტიის მთავარ კონკურენტად მიიჩნევა ბლოკი, რომელის ლიდერია სომხეთის ყოფილი პრეზიდენტი რობერტ კოჩარიანი.

რამდენიმეთვიანი პროტესტისა და სამხედროების მოთხოვნის შემდეგ, სომხეთის პრემიერმინისტრი, ნიკოლ ფაშინიანი 25 აპრილს გადადგა. ფაშინიანმა განაცხადა, რომ თანამდებობიდან გადადგებოდა და ვადამდელ არჩევნებს დათანხმდებოდა, თუ არ წარადგენდნენ პრემიერმინისტრობის სხვა კანდიდატებს, რაც პარლამენტის დაშლას და რიგგარეშე არჩევნების დანიშვნას გამოიწვევდა. შეთანხმების მიხედვით, სომხეთის პრეზიდენტმა ვადამდელი არჩევნები 20 ივნისს ჩაინიშნა.

ფაშინიანის გადადგომის მოთხოვნით საპროტესტო ტალღა მას შემდეგ გააქტიურდა, რაც ყარაბაღის ომი საერთო შეთანხმებით დასრულდა და რეგიონზე კონტროლი აზერბაიჯანს გადაეცა. ომის შედეგს სომხური მხარე დამარცხებად აღიქვამდა.