განახლება: მასალის თავდაპირველი ვერსია, შესაძლოა, აღქმული ყოფილიყო არასწორად, ამიტომ შეიცვალა.

სომხეთის პრემიერმინისტრმა, ნიკოლ ფაშინიანმა განაცხადა, რომ მზად არის ვადამდელი არჩევნებისთვის და მეტიც, თავად სურს, რომ ის ჩატარდეს და ხალხმა გადაწყვიტოს ვისი ყოფნა და ვისი წასვლა სურს. ამის შესახებ მან მიტინგზე სიტყვით გამოსვლისას განაცხადა, სადაც ბოდიშიც მოიხადა, თავისი და მთავრობის შეცდომების გამო.

თუმცა ვადამდელი არჩევნების დანიშვნამდე ფაშინიანმა ოპოზიციას იმ მემორანდუმის პირობების შესრულება მოსთხოვა, რომელზე ხელის მოწერა ჯერ კიდევ გასულ წელს შესთავაზა. კერძოდ, ფაშინიანმა მოუწოდა ოპოზიციურ საპარლამენტო პარტიებს დაედოთ პირობა, რომ მისი გადადგომის შემთხვევაში, არ წარადგენდნენ პრემიერმინისტრობის კანდიდატებს, რაც პარლამენტის დაშლას და რიგგარეშე არჩევნების დანიშვნას გამოიწვევდა. მაშინ ოპოზიციურმა პარტიებმა ფაშინიანს უარი უთხრეს. ოპოზიციას სურდა, რომ ის გადამდგარიყო და ხელახალი არჩევნები გარდამავალ მთავრობას ჩაენიშნა.

სომხეთის დედაქალაქის მთავარ მოედანზე აქციებს მართავენ როგორც ხელისუფლების, ასევე, ოპოზიციის მხარდამჭერები. ოპოზიცია ქვეყნის პრემიერმინისტრის, ნიკოლ ფაშინიანისა და მთავრობის გადადგომას ითხოვს.

ფაშინიანი სიტუაციის განმუხტვას ცდილობს. ის პოლიტიკურ ძალებს მოუწოდებს, შეწყვიტონ დაუმორჩილებლობა და ერთად მოაგვარონ კრიზისი. პრემიერმინისტრის თქმით, მზადაა, მის წინააღმდეგ განსაკუთრებით მკაცრად განწყობილ პოლიტიკურ ძალებთანაც გამართოს მოლაპარაკება.