საგარეო საქმეთა მინისტრის, დავით ზალკალიანის განცხადებით, მინსკის საერთაშორისო აეროპორტში ოპოზიციონერი ბელარუსი ჟურნალისტის დაკავებაზე "მყისიერად გააკეთეს რეაგირება". მისი მტკიცებით, დაუყოვნებლივ მოუწოდეს, რომ ყველა ადამიანი, ვინც უკანონოდ იყო დაკავებული, გათავისუფლებულიყო.

"ჩვენ მყისიერად გავაკეთეთ რეაგირება, დაუყოვნებლივ მოვუწოდეთ, რომ ყველა ადამიანი, ვინც მაშინ იყო იქ უკანონოდ დაკავებული, ყოფილიყო გათავისუფლებული. რა თქმა უნდა, გულისხმობდა იმ ადამიანს, ვის გამოც მოხდა თვითმფრინავის დაბრუნება და რა თქმა უნდა, ჩვენ შევუერთდით ევროკავშრის განცხადებას.

მინდა, თქვენ იხილოთ ევროკავშრის განცხადება, რომელიც იქნა მიღებული სწორედ ამ ინციდენტთან დაკავშირებით, სადაც პირდაპირ არის საუბარი საერთაშრისო სამართლის ნორმების დარღვევაზე და საქართველო არის თანამონაწილე და ჩვენ ამ განცხადების ხელმომწერი ვართ. რა თქმა უნდა, ჩვენ ყველანაირად ვიქნებით ჩვენი ევროპელი პარტნიორების გევრდით, იმისთვის, რომ დაცული იყოს ფუნდამენტური უფლება, რაც არის ადამიანის უფლებები", — თქვა მან.

23 მაისს ათენიდან ვილნიუსისკენ მიმავალი Ryanair-ის თვითმფრინავი მინსკის აეროპორტში საგანგებოდ დაეშვა. ეს მას შემდეგ მოხდა, რაც გავრცელდა ინფორმაცია, რომ ბორტზე ასაფეთქებელი. საბოლოოდ შეტყობინება ცრუ აღმოჩნდა. ბელარუსის თავზე კი თვითმფრინავს სამხედრო გამანადგურებელი MiG-29 დაყვებოდა.

მგზავრებს შორის ოპოზიციური ტელეგრამარხის Nexta-ს ხელმძღვანელი, რომან პროტასევიჩი, რომლის წინააღმდეგაც ბელარუსში სისხლის სამართლის საქმეა აღძრული და მასობრივი არეულობის ორგანიზებას ედავებიან. პროტასევიჩი და მისი შეყვარებული, რუსეთის მოქალაქე სოფია საპეგა აეროპორტში დააკავეს. შვიდსაათიანი დაკავების შემდეგ კი ლაინერი ვილნიუსში ჩავიდა.

ევროპული ქვეყნების დიდმა ნაწილმა თვითმფრინავის დაშვება სწორედ პროტასევიჩის დაკავებას დაუკავშირა. ლიეტუვამ თავის მოქალაქეებს მოუწოდა ბელარუსის დატოვებისკენ და განაცხადა, რომ ბელარუსის საჰაერო სივრციდან რეისების მიღებასა და გაგზავნას წყვეტს. ბელარუსთან საჰაერო მიმოსვლის შეწყვეტას გეგმავს უკრაინა.

დაკავებიდან თითქმის ერთი დღის თავზე ბელარუსის სახელმწიფო მედიებმა პროტასევიჩის ვიდეო გაავრცელეს, სადაც ის აცხადებდა, რომ აღიარებით ჩვენებას აძლევდა. ასევე, აცხადებდა, რომ თავს კარგად გრძნობდა და მინსკის იზოლატორში იმყოფებოდა.

მომხდარს 24 მაისს გამოეხმაურა საგარეო საქმეთა სამინისტროც. "მათი იძულებით დაკავება სრულიად მიუღებელია", — მხოლოდ ამ განცხადებით შემოიფარგლა უწყება. ზალკალიანი კი ამტკიცებს, რომ ტვიტში გათავისუფლებისკენ მოწოდებაც იყო.