2019 წლის 20 ივნისის აქციაზე დაშავებული და დაკავებული დემონსტრანტები ორი წლის შემდეგ ისევ გამართავენ აქციას რუსთაველზე. აქცია პარლამენტის მიმდებარე ტერიტორიაზე 18:00 საათზე დაიწყება და მონაწილეები პარლამენტში დარეგისტრირებულ ამნისტიის შესახებ კანონპროექტებს გააპროტესტებენ.

"დღეს, როდესაც საქართველოს პარლამენტში დარეგისტრირებულია ორი კანონპროექტი, რომელიც ამ გამოუძიებელ დანაშაულებრივ ფაქტზე ამნისტიას აცხადებს, სასიცოცხლოდ მნიშვნელოვნად მიგვაჩნია სწორედ 20 ივნისს აქციაზე პატრიოტული მოტივით მდგარმა დემონსტრანტებმა, კიდევ ერთხელ ვუთხრათ ყველა პოლიტიკურ ძალას, ქვეყნის შიგნით თუ გარეთ, რომ 20 ივნისი ვერ გადაიწერება, აქციის დარბევა ოკუპანტის საამებლად არავის შერჩება!" — აცხადებენ აქციის ორგანიზატორები.

პარლამენტში ამნისტიის შესახებ ორი კანონპროექტია დარეგისტრირებული — ერთი ოპოზიციის და ერთიც მმართველი პარტიის.

20 ივნისთან დაკავშირებულ საქმეებზე ამნისტიის მიღება ევროპული საბჭოს პრეზიდენტის, შარლ მიშელის ინიციატივით შემქნილი დოკუმენტის ერთ-ერთი პუნქტი იყო.