ბელარუსის პრეზიდენტმა, ალექსანდრე ლუკაშენკომ 9 მაისს ხელი მოაწერა განკარგულებას, რომლითაც მისი მოკვლის შემთხვევაში ძალაუფლების გადაცემა განისაზღვრება.

როგორც პრესსამსახური ინფორმაციას ავრცელებს, თავდასხმის, ტერორისტული აქტის, საგარეო აგრესიის ან სხვა ძალადობრივი ქმედებების შედეგად ლუკაშენკოს დაღუპვის შემთხვევაში, სახელმწიფო ორგანოები და მაღალჩინოსნები უსაფრთხოების საბჭოს გადაწყვეტილებების შესაბამისად მოქმედებენ, რომელსაც პრემიერმინისტრი თავმჯდომარეობს. ამასთან, ქვეყნის ტერიტორიაზე ცხადდება საგანგებო ან საომარი მდგომარეობა.

რადიო თავისუფლების რუსული სამსახური წერს, ლუკაშენკომ განკარგულების ხელმოწერა მას შემდეგ გადაწყვიტა, რაც აპრილში სპეცსამსახურებმა განაცხადეს, რომ თითქოსდა სამხედრო გადატრიალება აღკვეთეს. უსაფრთხოების საბჭოში ლუკაშენკოს გარდა 8 ადამიანი შედის, მათგან ოთხი ძალოვანი სტრუქტურის წარმომადგენელია.

გასული წლის აგვისტოში ჩატარებული არჩევნების შემდეგ, ლუკაშენკომ გამოაცხადა, რომ 26-წლიანი მმართველობის შემდეგ ისევ ქვეყნის პრეზიდენტია. არჩევნების ლეგიტიმურობას არ აღიარებენ როგორც ქვეყნის შიგნით, ისე მის ფარგლებს გარეთ.

ფალსიფიცირებული არჩევნების შემდეგ ქვეყანაში მასობრივი აქციები მიმდინარეობდა, რომლებსაც ხელისუფლება პოლიციური ძალის გამოყენებით ახშობდა.

ლუკაშენკოს ლეგიტიმურობა ევროპის ქვეყნები არ აღიარებენ და აქტივისტებზე ძალადობას გმობენ.