რა ხდება: სულ ცოტა ხანში, რესპუბლიკის მოედანზე რუსული კანონის საწინააღმდეგო აქცია დაიწყება.

დეტალები: ორგანიზატორების თქმით, გამოსვლები 8 საათზე დაიწყება.

  • აქცია, დაახლოებით, 1-დან 2 საათამდე გასტანს, შემდეგ კი დემონსტრანტები მსვლელობით პარლამენტის შენობისკენ დაიძვრებიან.
  • დღევანდელი ღონისძიება სწორედ საკანონმდებლო ორგანოს მიმდებარედ დასრულდება.

რა არის აქციის მიზანი: გარდა იმისა, რომ მოსახლეობა კიდევ ერთხელ მოსთხოვს ხელისუფლებას, გაიწვიოს რუსული კანონი, საქართველოს მომავლის აკადემიის დამფუძნებელი ალექსანდრე ზიბზიბაძე ამბობს, რომ აქციის ორგანიზატორებისა და მონაწილეებისთვის არის მნიშვნელოვანი ერთიანობა:

  • "ამიტომაც ჩაინიშნა დღევანდელი აქცია დღეს და არა ხვალ, რომ ჩვენ არაფერი გასაყოფი არ გვაქვს იმ ადამიანებთან, ვინც ხვალ იკრიბებიან რუსთაველზე, ვიცით რომ მათგან ბევრი ჩვენი მომხრე და თანამოაზრეც არის და სამწუხაროდ, იძულებით უწევთ მიტინგზე გასვლა ხვალ.
  • [დღევანდელი აქცია] ერთიანობის მესიჯიც არის და ასევე, ჩვენი უცხოელი პარტნიორებისთვის და ყველასთვის ჩვენება, რომ ბევრნი ვართ და რომ ამ კანონს ხელისუფლებას არ მივაღებინებთ", — თქვა მან NEWS.on.ge-სთან.

კონტექსტი: ქართული ოცნება ხვალ, 29 აპრილს რუსული კანონის მოწინააღმდეგეთა კონტრაქციას გამართავს.

პარტიის ლიდერებმა თქვეს, რომ "ეს მათი მხარდამჭერების თხოვნა იყო".

  • "ერთად ვუთხრათ არა — შავ ფულს და ერთად ვუთხრათ კი — გამჭვირვალობას, ჭეშმარიტ ევროპულ გზას, დამოუკიდებელ და სუვერენულ საქართველოს", — წერია განცხადებაში, რომელიც ქართულმა ოცნებამ გაავრცელა.

ასევე, ნახეთ: ოცნება ოფშორებთან დაკავშირებულ კანონს ივანიშვილს არგებს, იზრდება კრიმინალური და რუსული კაპიტალის შემოდინების რისკიც — TI