ჯანდაცვის მინისტრის მოადგილის, თამარ გაბუნიას ინფორმაციით გაიზრდება იმ სამედიცინო დაწესებულებების რაოდენობა, სადაც Sinopharm-ით აცრა იქნება შესაძლებელი.

"პრაქტიკულად, იმ ადგილების რაოდენობა რომელიც იყო გამოყოფილი, განსაკუთრებით თბილისში, შეივსო Sinopharm-ზე. ამ კვირაში, მალე ძალიან, დღეს-ხვალ ვიმსჯელებთ და დავამატებთ დამატებით დაწესებულებებს", — განაცხადა გაბუნიამ საკოორდინაციო საბჭოს დასრულების შემდეგ.

მისი თქმით, იქედან გამომდინარე, რომ Sinopharm-ით აცრის შემდეგ გვერდითი მოვლენების რისკი მინიმალურია, მისი გაკეთება ამბულატორიებშიც შესაძლებელია.

"Sinopharm-ით ვაქცინაცია პოლიკლინიკურ დაწესებულებებშიც შესაძლებელია რომ ჩატარდეს, რადგან მასთან დაკაშირებული გვერდითი მოვლენები პროგნოზულად ყველაზე ნაკლებია და პრაქტიკულად არ არის ანაფილაქსიასთან დაკავშირებული რისკები გამოხატული. ამდენად, ამბულატორიულ ქსელში Sinopharm-ის გაკეთება უსაფრთხოდ არის შესაძლებელი", — განაცხადა თამარ გაბუნიამ.

დაავადებათა კონტროლისა და საზოგადოებრივი ჯანდაცვის ეროვნული ცენტრის ინფორმაციით, 4 მაისის Sinopharm-ით ვაქცინა დაიწყო 30 დაწესებულებაში. ხვალიდან, 5 მაისიდან კი მათ კიდევ 44 დაწესებულება დაემატება.

აღსანიშნავია, რომ თავდაპირველად AstraZeneca-ს ვაქცინის გაკეთებაც იყო შესაძლებელი ამბულატორიებში. თუმცა, მას შემდეგ, რაც ახალციხელი ექთანი AstraZeneca-თი აცრის შემდეგ, სავარაუდოდ, ანაფილაქსიური შოკით გარდაიცვალა, მისი გამოყენება მხოლოდ მრავალპროფიულ სტაციონარებში გახდა შესაძლებელი. რაც შეეხება Pfizer-ის ვაქცინას, მისი გამოყენება თავიდანვე მხოლოდ სამი დიდი ქალაქის — თბილისის, ქუთაისისა და ბათუმის — 6 კლინიკაში იყო შესაძლებელი.