საქართველოს ყოფილი სახალხო დამცველისა და დემოკრატიის კვლევის ინსტიტუტის დამფუძნებლის, უჩა ნანუაშვილის განცხადებით, გალისა და ახალგორის მოსახლეობა საომარ ვითარებაში ცხოვრობს.

"გალში, ისევე როგორც ახალგორში, შეიძლება ითქვას, რომ კვლავ მიმდინარეობს ომი. ომი, რომელიც დაიწყო წლების წინ, რეალურად, არ დასრულებულა ამ ადამიანების ცხოვრებაში. ჩვეულებრივი ომი მიდის. ეს ომი არის უბრალოდ ჩუმი ომი. ფაქტობრივად, ისინი არიან სწორედ ამ ხაზზე, საომარ ხაზზე.

სამწუხაროა, რომ მათ არ ჰყავთ მხარდამჭერი. არ ჰყავთ ზურგი, რომელიც მათ დაეხმარება, მათ საჭიროებებზე გაითვალისწინებს. განახორციელებს პოლიტიკას, რომელიც იქნება მიმართული სწორედ ამ ადამიანების გაძლიერებისკენ, მათი უფლებების დაცვისკენ. ამის საპირისპიროდ, ჩვენ ვხედავთ პირიქით, შეზღუდვებს", — განაცხადა უჩა ნანუაშვილმა ფორმულას ეთერში.

ასე გამოეხმაურა ნანუაშვილი მდინარე ენგურში 4 ადამიანის დახრჩობას. ცნობილია, რომ ეს ადამიანები ოკუპირებული აფხაზეთიდან საქართველოს მიერ კონტროლირებად ტერიტორიაზე ე.წ. შავი გზებით გადმოსვლას ცდილობდნენ. ხიდი წელიწადზე მეტი ხნის წინ, საქართველოში Covid-19-ის პირველი შემთხვევის დაფიქსირებისთანავე, აფხაზეთის დე ფაქტო მთავრობამ ჩაკეტა.

ადგილობრივები ამბობენ, რომ აფხაზებთან გარკვეული სახის მოლაპარაკების საფუძველზე ხიდის გადაკვეთის შესაძლებლობა არის, თუმცა ბარიერი საქართველოს მთავრობის მიერ დაწესებული 5-დღიანი სავალდებულო კარანტინია. აღსანიშნავია, რომ საქართველოს სხვა მოქალაქეებისთვის სავალდებულო კარანტინის რეჟიმი არ მოქმედებს.

უჩა ნანუაშვილი ოკუპაციის ზოგად პრობლემასთან ერთად, საქართველოს ცენტრალური ხელისუფლების პასუხისმგებლობასაც ხედავს.

"რა თქმა უნდა, პრობლემა არის რუსული ოკუპაცია. ის ომი, რაც მოხდა. ეს არის მიზეზი იმის, რაც ხდება ზოგადად, მთლიანად ოკუპირებულ ტერიტორიებზე. მაგრამ, ეს არის ერთი მიზეზი. მოდით ვიყოთ გულწრფელები — რა გააკეთა საქართველოს ხელისუფლებამ იმისთვის, რომ მოეხდინა პრევენცია ასეთი ტრაგედიის?! რას აკეთებს ხელისუფლება იმისთვის, რომ ხვალ აირიდოს თუნდაც ახალი, მსგავსი ტრაგედია?!", — ამბობს ნანუაშვილი.

ენგურის ხიდი, რომელიც გალელებისთვის დანარჩენ საქართველოსთან დამაკავშირებელი ერთადერთი გზაა, წლის განმავლობაში მხოლოდ ხუთჯერ, რამდენიმე დღით, ცალმხრივად გაიხსნა. აფხაზურმა მხარემ რეგიონში მცხოვრები ადამიანებისთვის, რომლებიც საქართველოს მიერ კონტროლირებად ტერიტორიაზე სამედიცინო ან სხვა მიზნით იმყოფებოდნენ, გზა ჰუმანიტარული მიზნით გახსნა, რათა მოქალაქეები თავიანთ სახლებში დაბრუნებულიყვნენ.

ხიდი, ასევე, გაიხსნა 2020 წლის 15 ოქტომბრიდან 30 დეკემბრამდე იმ პირებისთვის, რომლებიც პენსიებსა და სოციალურ შემწეობებს იღებდნენ. მათ ენგურის ხიდამდე მისვლა მხოლოდ ამ დახმარებების ასაღებად შეეძლოთ. სხვაგან გადაადგილების უფლება არ ჰქონდათ.

გადაადგილება შეეძლოთ, აგრეთვე, პაციენტებს, რომლებსაც გადაუდებელი სამედიცინო დახმარება ესაჭიროებოდათ. თუმცა, იგივე შეღავათი არ მოქმედებდა და დღემდე არ მოქმედებს ადამიანებზე, რომლებსაც ქრონიკული ან სხვა დაავადებები აწუხებთ.

გაიგეთ მეტი: