მალეფისენტს თუ არ ჩავთვლით, ბოლო პერიოდში ანჯელინა ჯოლი მასშტაბურ კინოპროექტებში აღარ გვიხილავს: ძირითადად მხოლოდ ანიმაციურ პერსონაჟებს ახმოვანებდა. თუმცა სულ მალე ახალ მძაფრსიუჟეტიან თრილერში გამოჩნდება.

Those Who Wish Me Dead (ვინც ჩემს სიკვდილს ნატრობს) — ასე ჰქვია ახალ ფილმს, რომელშიც ანჯელინა ჯოლი მთავარ როლს ასრულებს: ოსკაროსანი მსახიობი მეხანძრეს, სახელად ჰანას, განასახიერებს, რომელიც ტრავმირებული 12 წლის ბიჭის გადარჩენას საკუთარი სიცოცხლის გარისკვის ფასად ცდილობს.

თუ როგორი დაძაბული, სახიფათო და დამაინტრიგებელი იქნება ამ გმირის თავგადასავალი, ამაში ცოტა ხნის წინ გამოსულ ტრეილერში იხილავთ:

ვინც ჩემს სიკვდილს ნატრობს ამერიკელი ბესტსელერი მწერლის, მაიკლ კორიტას ამავე სახელწოდების რომანის მიხედვით ტეილორ შერიდანმა გადაიღო, რომელიც წარსულში ისეთი ცნობილი ფილმების სცენარისტი იყო, როგორებიცაა Sicario და Hell or High Water.

ამ ახალ ფილმში ანჯელინა ჯოლისთან ერთად ვიხილავთ ნიკოლას ჰოლტს, ეიდენ გილენს და ტაილერ პერის.

ფილმის პრემიერა 14 მაისსაა დაგეგმილი.