ჯანდაცვის კომიტეტის თავმჯდომარის პირველი მოადგილე, ზაალ მიქელაძე ბათუმის რესპუბლიკურ საავადმყოფოში AstraZeneca-ს ვაქცინით საჯაროდ აიცრა. მიქელაძე პარლამენტის წევრად არჩევამდე აჭარის ჯანდაცვისა და სოციალური დაცვის მინისტრი იყო.

როგორც მიქელაძე ამბობს, მას არც საექიმო აქტივობით დ არც ასაკით არ უწევდა ვაქცინა, თუმცა, აცრის გაკეთება სხვებისთვის მოტივაციის მისაცემად გადაწყვიტა.

"მე, წესით, არც ასაკით და არც სამედიცინო აქტივობით არ მეკუთვნოდა ამ იმუნიზაციაში, ამ ეტაპზე ჩართვა, მაგრამ, გადავწყვიტე, პირველ რიგში, ჩემი მოქალაქეების და განსაკუთრებით კოლეგებისათვის მოსაწოდებლად. იმიტომ, რომ ჩვეულებრივი მოქალაქეები სწორედ სამედიცინო პერსონალზე ყურადღების მიქცევით ახერხებენ გადაწყვეტილების მიღებას.

რაც მეტი ადამიანი მოახერხებს ჩართვას, რაც უფრო მაღალი მოცვა ექნება იმუნიზაციას, რა თქმა უნდა, ეს საშუალებას მისცემს ქვეყანას, რომ დაუბრუნდეს ჩვეულებრივი, სტანდარტული ცხოვრების რეჟიმს", — განაცხადა ზაალ მიქელაძემ აცრის გაკეთების შემდეგ.

ბათუმის რესპუბლიკურ საავადმყოფოში იმყოფება ჯანდაცვის მინისტრი, ეკატერინე ტიკარაძეც. მან ახალი ლაბორატორია და დიალეზის განყოფილება დაათვალიერა.

ტიკარაძემ რეგიონებში, სამედიცინო პერსონალთან ვაქცინაციაზე "ინტენსიურ გასაუბრებები" 22 მარტს დააანონსა. მეორე დღეს, იგი საჩხერის სამედიცინო ცენტრს ეწვია და AstraZeneca-ს ვაქცინა მანაც საჯაროდ გაიკეთა.

ვაქცინაციის დაწყების პირველივე დღეს აიცრნენ დაავადებათა კონტროლის ეროვნული ცენტრის დირექტორის მოადგილე, პაატა იმნაძე; ინფექციური საავადმყოფოს კლინიკური დირექტორი, მარინა ეზუგბაია და ბოქსირებული განყოფილების ხელმძღვანელი, მარინა ენდელაძე; აჭარის ჯანდაცვისა და სოციალური დაცვის მინისტრი, ნინო ნიჟარაძე.

24 მარტს პირდაპირ ეთერში აიცრა საპარლამენტო უმრავლესობის წევრი, ლადო კახაძეც. უფრო ადრე, 18 მარტს, ასევე საჯაროდ გაიკეთა ვაქცინა პრეზიდენტმა სალომე ზურაბიშვილმაც.

კორონავირუსის საწინააღმდეგო ვაქცინაცია საქართველოში 15 მარტს, სწორედ AstraZeneca-ს ვაქცინით დაიწყო. 25 მარტს ქვეყანაში უკვე Pfizer-ის ვაქცინაც შემოვიდა და ახლა სამედიცინო სფეროს წარმომადგენლებს, ასევე, 65 წელს ზემოთ მოქალაქეებს ვაქცინის არჩევის შესაძლებლობა აქვთ.

გაიგეთ მეტი: