დედამიწის შემსწავლელ მეცნიერებათა ინსტიტუტის სეისმოლოგი, თეა გოდოლაძე ამბობს, რომ მაჭავარიანის ქუჩის ფერდობზე ახალი ბზარები გაჩნდა.

"მე ვიმყოფები მაჭავარიანის ქუჩაზე მადაგონის წინა მხარეს, ფერდზე ვართ ასული, ჩვენ დაგვიკავშირდნენ, რომ აქ არის გარკვეული დანაპრალება დაწყებული [...] ჯერ ხავსმოკიდებული არაა და, ფაქტობრივად, ამ ტერიტორიაზე შეინიშნება დაბზარვა. ეს იმ კონდიციამდე არაა მიღწეული და ასეთი ტემპით თუ გაგრძელდა, იმ კონდიციამდე მივალთ", — თქვა გოდოლაძემ ფეისბუქზე ჩართვის დროს.

როგორც მეცნიერი ამბობს, მეწყერულ ფერდზე წამოსული გრუნტის გაჩერებას ბეტონის კედლებით ცდილობენ, რაც არარეალურია. ამასთან, იგი აღნიშნავს, რომ დასაწყებია პროცესის მონიტორინგი, რისი შესაძლებლობაც საქართველოში არაა.

"აუცილებლად დასაწყებია მონიტორინგის პროცესი, რადგან ის დინამიკაშია მისული და პროცესის შორსაა წასული, რასაც ჰქვია თიბისის კომპლექსის გვერდით მდებარე ფერდის ნაწილზე, რაც ახლაა დინამიკაში მოსული. აქაც მალე ანალოგიური მდგომარეობა იქნება, თუ ასე გავაგრძელეთ, არ ვიცი რა ვუწოდო... ეს სოკოებივით ამოსული კორპუსი, რომელთა მშენებლობის ხარისხი არის ძალიან დაბალი და საფრთხის შემცველი", — აღნიშნავს თეა გოდოლაძე.

ვაშლიჯვრისა და ნუცუბიძის დამაკავშირებელ გზაზე მეწყერი ჩამოწვა. ამის ამსახველი ფოტოები 17 მარტს ფორუმზე გავრცელდა. მეწყერზე 17 მარტს ისაუბრა თბილისის მერმა, კახა კალაძემაც. მისი თქმით, აღნიშნულ ტერიტორიაზე განხორციელებული სხვადასხვა აქტივობის გამო, დროებით სტაბილიზაციაში მყოფ ძველ მეწყრულ არეალში მეორადი გენერაციის მეწყერი განვითარდა. კალაძის განცხადებით, მოქალაქეთა უსაფრთხოების მიზნით, ტრანსპორტის მოძრაობა დროებით ორმხრივად შეიზღუდა.

სპეციალისტები ამბობენ, რომ პრობლემა სერიიოზულია და საუბარია ნახევარი მილიონი კუბური მეტრის მასაზე, რომლის შეჩერება შეუძლებელია. ამასთან, მერიაში აცხადებენ, რომ მოსახლეობას საფრთხე არ ემუქრება.

გაიგეთ მეტი: