საქართველოს ახალგაზრდა იურისტთა ასოციაციის თავმჯდომარე, ნიკა სიმონიშვილი აცხადებს, რომ ფორმულას ჟურნალისტ ვახო სანაიაზე თავდასხმა არის მაგალითი, როგორ ცუდად შეიძლება იმოქმედოს ხელისუფლების რიტორიკამ კრიტიკული ჟურნალისტების წინააღმდეგ.

ჟურნალისტებზე თავდასხმისა და პროფესიულ საქმიანობაში ხელის შეშლის ფაქტებზე მან პლატფორმა Clubhouse-ის On.ge-ს ოთახში ისაუბრა.

"ის რაც ვახო სანაიას წინააღმდეგ მოხდა, იყო ერთ-ერთი მაგალითი, როგორ შეიძლება ცუდად იმუშაოს ხელისუფლების რიტორიკამ კრიტიკული ჟურნალისტების წინააღმდეგ [...] დღეს ვნახეთ ისიც, რომ უკვე ხელისუფლება კი არა მხოლოდ, სამწუხაროდ, უკვე სასულიერო პირებიც, კონკრეტულ ტელევიზიებზე ამბობენ, რომ ნუ ისინი ეშმაკის მსახურები არიან. რა თქმა უნდა, ასეთი მოწოდებები საჯარო პირებისგან, ასეთი კომენტარები, საბოლოო ჯამში, მოქმედებს საზოგადოებრივ გარკვეულ ნაწილზე. ეს საზოგადოებაში აჩენს განცდას, რომ ისინი [ჟურნალისტები] არიან მტრები — მტრები დემოკრატული საზოგადოებისა, მტრები ხალხის და საბოლოო ჯამში ვენ ვიღებთ ასეთ შედეგებს", — აცხადებს სიმონიშვილი.

საია-ს თავმჯდომარე ამბობს, რომ საზოგადოებაში არსებობს დაუსჯელობის სინდრომი ჟურნალისტებზე თავდასხმის შემთხვევაში. მან გაიხსენა მაგალითებიც, როცა სახელმწიფო არათუ იცავს ჟურნალისტებს, არამე თავად ესხმის თავს.

"დაუსჯელობის სინდრომი არის ძალიან მნიშვნელოვანი. ჩვენ, სამწუხაროდ, გვაქვს არასწორი რეაგირების ბევრი მაგალითი. შემიძლია რამდენიმე გავიხსენო — მაგალითად, 20-21 ივნისის მოვლენები: ჟურნალისტებს დამიზნებით ესროდნენ ტყვიებს. საიას არაერთი ჟურნალისტის საქმე აქვს წარმოებაში, მათ შორის არიან On.ge-ს ჟურნალისტებიც. ამ საქმეებში გამოძიება არ იძვრის, წინ არ მიდის. შედეგს ერ ვხედავთ, ერთადერთი რაც დაგვრჩენია, ეს არის რომ არაეფექტური გამოძიებისთვის უნდა ვუჩივლოთ სტრასბურგში სახელმწიფოს", — ამბობს სიმონიშვილი.

იურისტი საუბრობს სისხლის სამართლის კოდექსის 154-ე მუხლზე, რაც ჟურნალისტისთვის პროფესიულ საქმიანობაში უკანონოდ ხელის შეშლას გულისხმობს. ნიკა სიმონიშვილის თქმით, ამ მუხლით საქმეები ან საერთოდ არ იწყება, ან იწყება, მაგრამ, არ სრულდება გამოძიება.

"აქ არის ორი მომენტი: ერთი ის რომ ამ მუხლით გამოძიება დაიწყონ და მეორე, რომ ამ მუხლით დაწყებული გამოძიება ბოლომდე მიიყვანონ. 20-21 ივნისის საქმეებზე ამ მუხლითაა დაწყებულია გამოძიება, მაგრამ, არ მიდის საქმეები ბოლომდე.

ხელსუფება ამაყობს, რომ მე არ მაქვს 154-ე მუხლით შედეგები, ანუ არავისთვის ასე ხელი არ შეუშლიათ. აქ საამაყო არაფერი არ არის. ეს იმას კი არ ნიშნავს, რომ ასეთი ფაქტები არ ხდება, უბრალოდ ხელისუფლება ამას არ იძიებს. ეს არის ძალიან სერიოზული პრობლემა", — განაცხადა ნიკა სიმონიშვილმა.

ფორმულას ჟურნალისტს, ვახო სანაიას თავს 25 თებერვალს დაესხნენ. მას ტვინის შერყევა დაუდასტურდა. სანაია ამბობს, რომ თავდამსხმელებისგან პირდაპირი აგრესია იგრძნობოდა ტელევიზიების, განსაკუთრებით კი, კრიტიკული მედიის წარმომადგენლების მიმართ.

25 თებერვლის ქადაგებისას, სხალთელმა მთავარეპისკოპოსმა სპირიდონმა მთავარი არხის, TV პირველისა და ფორმულას ჟურნალისტები "სატანის მიკროფონებად" მოიხსენია.

გაეცანით ხელისუფლების წარმომადგენელთა კომენტარებს ვახო სანაიას საქმეზე: