ქართული ოცნების დეპუტატის, გია ვოლსკის განცხადებით, "კრიტიკაზე, დიდი ბოდიში და, უარს ვერ" იტყვის. ასე პასუხობს ის მედიას ტელეკომპანია ფორმულას ჟურნალისტზე, ვახო სანაიაზე თავდასხმის შემდეგ. სანაია თავდასხმას თავის პროფესიულ საქმიანობას უკავშირებს და ამბობს, რომ ეს გამოიწვია იმ "პროპაგანდამ", რაც კრიტიკული არხების მიმართ ხორციელდება.

"ჩვენ კრიტიკას, დიდი ბოდიში და, უარს ვერ ვიტყვით, იმიტომ, რომ ისეთივე მოქალაქეები ვართ სრულუფლებიანი ამ ქვეყნის, როგორიც თქვენ ხართ. მაგრამ თქვენი კრიტიკა, ხშირ შემთხვევაში და უმეტეს შემთხვევაში, აბსოლუტურად უსაფუძვლო დამოკიდებულება, ადამიანური დამოკიდებულებიდან დაწყებული დამთავრებული საქმიან დამოკიდებულებამდე, ვერანაირ კრიტიკას ვერ უძლებს.

ვინც თავს დაესხმება ამ კონტექსტში, თქვენ ან ჩვენ წარმომადგენელს, თქვენი პოლიტიკური მხარდამჭერების მხრიდან ვამბობ, არის სწორედაც ის, რაც დისკრედიტაცის უკეთებს პოლიტიკურ პარტიას. თავდამსხმელები, აგრესორები დღესდღეობით ჩვენ ვიხილეთ კონკრეტული პოლიტიკური პარტიის გარშემო.

ვისაც ჩვენ მიმართ აქვს გარკვეული მხარდაჭერა, იმან არათუ არ უნდა გააკეთოს არანაირი თავდასხმა, საუბარშიც კი უნდა იყოს გაცილებით თავშეკავებული, ვიდრე თქვენი პოლიტიკური წარმომადგენლები არიან ამ პოლიტიკურ ასპარეზზე", — უთხრა მან ჟურნალისტებს.

ვახო სანაიას 25 თებერვალს თავს დაესხნენ. შინაგან საქმეთა სამინისტრომ მომხდარზე სამი პირი უკვე დააკავა და საქმე სისხლის სამართლის კოდექსის 126-ე მუხლის პირველი პრიმა ნაწილის ბ და გ ქვეპუნქტებით აღძრა, რაც ორი ან მეტი პირის მიმართ ჯგუფურად ჩადენილ ძალადობას გულისხმობს.