22 მაისს, 16:00 საათზე, მოძრაობა Defend Liberty-ის ორგანიზებით, მთავრობის კანცელარიასთან საპროტესტო აქცია ლოზუნგით, STOP Russia გაიმართება.

აქციის ორგანიზატორები მოითხოვენ საოკუპაციო ზოლის გასწვრივ უსაფრთხოებისთვის საჭირო ძალების მობილიზებას და საერთაშორისო საზოგადოების კონსოლიდაციასა და მათ სასწრაფო ინფორმირებას.

"საქართველოს ხელისუფლების არაადეკვატურობის, უყურადღებობის, რუსეთთან ყველაფრის დათმობისა და უსაფრთხოების სისტემის შესუსტების შედეგად, ოკუპანტი კიდევ უფრო გათავხედდა, რაც მომხდარ ტრაგედიაზე რუსეთის ფედერაციის საგარეო საქმეთა სამინისტროს ცინიკურმა განცხადებამაც დაადასტურა",- წერია აქციის ორგანიზატორების მიერ გავრცელებულ განცხადებაში.

19 მაისს, დაახლოებით 14:30 საათზე, ზუგდიდის რაიონის სოფელ ხურჩაში, საოკუპაციო ხაზის მიმდებარედ, ოთხმა შეიარაღებულმა პირმა, ცეცხლსასროლი იარაღით გალის რაიონის სოფელ ბარღების მკვიდრ გიგა ოთხოზორიას ჭრილობა მიაყენა, რის შედეგადაც ის გარდაიცვალა.

შემთხვევას უკვე გამოეხმაურა საქართველოს საგარეო საქმეთა სამინისტრო და პასუხისმგებლობა მთლიანად რუსეთის ფედერაციას დააკისრა. განცხადება ასევე გაავრცელა რუსეთის საგარეო საქმეთა სამინისტრომ, რომელმაც განაცხადა, რომ აღნიშნულთან არანაირი კავშირი არ აქვს რუს სამხედროებსა და მაღალჩინოსნებს.

გარდა ამისა, საქართველოში ევროკავშირის სადამკვირვებლო მისიამ სპეციალური განცხადება გააკეთა, რომ ხელისუფლებამ სასწრაფოდ უნდა გამოიძიოს ხურჩაში მომხდარი მკვლელობა.