აშშ-ს კონგრესის სენატში პრეზიდენტ დონალდ ტრამპის წინააღმდეგ პროცესი დაიწყეს. თვითონ ტრამპი სენატში დაკითხვაზე არ გამოცხადდება და მის პოზიციებს ადვოკატები, დევიდ შოენი და ბრიუს კასტორი დაიცავენ.

ტრამპი ისტორიაში აშშ-ს პირველი პრეზიდენტია, რომელსაც იმპიჩმენტი ორჯერ გამოუცხადეს. გასულ წელს სენატმა გაამართლა თეთრი სახლის ხელმძღვანელი, რომელსაც დემოკრატიული პარტია ძალაუფლების ბოროტად გამოყენებასა და მართლმსაჯულებისთვის ხელის შეშლის მცდელობაში ედავებოდა. ახლა ბრალი მას კვლავ დემოკრატიულმა პარტიამ წაუყენა და ამჯერად ამბოხის წაქეზებაში ადანაშაულებენ. საქმე ტრამპის მხარდამჭერების მიერ კაპიტოლიუმზე თავდასხმას ეხება.

დღედაინ სენატი სასამართლოდ გადაიქცევა, სადაც ბრალდების მხარეს კონგრესის 9 დემოკრატი წევრი წარმოადგენს. ისინი წარმომადგენელთა პალატის სპიკერმა, ნენსი პელოსიმ აარჩია. რამდენიმე კვირის წინ მათ ოფიციალურად გადასცეს სენატს ბრალდება, რის შემდეგაც ტრამპის ადვოკატებს პოზიციების შემუშავებისთვის დრო მიეცათ.

ტრამპის იურისტები იმპიჩმენტს არაკონსტიტუციურს უწოდებენ, რადგან პრეზიდენტმა ვადა ამოწურა, ხოლო მისი განცხადებები, რომლითაც ის მოუწოდებდა თავის მხარდამჭერებს, არ აღიარონ არჩევნების შედეგები და ბოლომდე იბრძოლონ, კონსტიტუციის პირველი შესწორებითაა დაცული.

სენატში მოსმენები 9 თებერვალს საღამოს იწყება. ყველა მხარეს თავისი პოზიციების დაფიქსირებისთვის ოთხ-ოთხი საათი ეძლევა. ამის შემდეგ პალატა კენჭს უყრის, შეუძლიათ თუ არა იმპიჩმენტის პროცედურის გაგრძელება, რისთვისაც უბრალო უმრავლესობაა საჭიროა.

თუ სენატი ამას მხარს დაუჭერს, მხარეებს პოზიციების დაცვისთვის უკვე 16-16 საათი ექნებათ. პროტოკოლის თანახმად, თითოეულ მხარეს დღეში 8 საათი ეძლევა.

არგუმენტების მოსმენის შემდეგ კი სენატორებს კითხვებისთვის 4 საათი გამოეყოფათ, რის შემდეგაც მათ უნდა გადაწყვიტონ მოითხოვონ თუ არა დამატებითი მტკიცებულებები და დოკუმენტები. ტრამპის გასამართლებისთვის სენატორების 2/3-ია საჭირო. თუ კანონმდებლებმა იმპიჩმენტს მხარი დაუჭირეს, დონალდ ტრამპი არჩევნებში მონაწილეობას ვეღარასდროს მიიღებს.