დღეს, 20 მაისს, ევროკავშირის საბჭოში საქართველოსთვის სავიზო ლიბერალიზაციის მინიჭების საკითხს განიხილავენ. საბჭოს მიერ გავრცელებულ პრესრელიზში ნათქვამია, რომ შეხვედრა იუსტიციისა და საშინაო საქმეების კომიტეტში განიხილება.

საბჭოს წევრები სავიზო პოლიტიკის შესახებ გაცვლიან აზრებს. საქართველოს საკითხთან ერთად, ასევე განიხილავენ უკრაინისთვის, კოსოვოსთვის და თურქეთისთვის, ევროკავშირის ქვეყნებში უვიზო მიმოსვლის თემას. ამას გარდა, საბჭო განიხილავს ე.წ. შეჩერების მექანიზმს რომელიც ითვალისწინებს უვიზო რეჟიმის დროებით შეჩერებას, ყველა არსებული სავიზო ლიბერალიზაციის შეთანხმებისთვის.

მექანიზმის მიხედვით, თუ 6 თვის განმავლობაში, ევროპის წევრ სახელმწიფოს ერთი ან მეტი გარკვეული სახის პრობლემები შეექმნება მესამე ქვეყნის მოქალაქეებთან და ამას თავად ვერ უმკლავდება, უფლება ექნება მიმართოს კომისიას თხოვნით, რომ მესამე ქვეყნისთვის უვიზო რეჟიმის მოქმედება დროებით შეაჩეროს. განსაკუთრებულ გარემოებებში შედის: არალეგალი მიგრანტების რაოდენობის ან თავშესაფრის მაძიებელთა თხოვნების ზრა.

როგორც განცხადებაში წერია, მინისტრები მიგრაციის თემებზე და ევროკავშირსა და თურქეთს შორის 2016 წლის 18 მარტს დადებული შეთანხმების შესახებაც იმსჯელებენ. სხდომაზე უნდა განიხილონ ამჟამინდელი სიტუაცია მიგრაციის კუთხით.

ევროკავშირის საბჭოს განცხადებაში მითითებულია, რომ ევროკომისიის ბოლო დასკვნის თანახმად, საქართველომ და უკრაინამ შეასრულეს ყველა კრიტერიუმი სავიზო ლიბერალიზაციის მისაღებად.

თურქეთმა 65 პუნქტი დააკმაყოფილა 72-დან, კოსოვოს კი კიდევ 2 მნიშვნელოვანი საკითხი დარჩა მოსაგვარებელი, ესენია, მონტენეგროსთან სასაზღვრო შეთანხმების რატიფიკაცია და ორგანიზებულ დანაშაულსა და კორუფციასთან ბრძოლა.