ე.წ. კარტოგრაფების საქმეზე დაპატიმრებული ივერი მელაშვილის ცოლი, თამარ სულაძე ბიძინა ივანიშვილს მიმართავს და ამბობს, რომ თუ მას "კეთილად მოაქვს თავი", უდანაშაულო ადამიანები ციხეში არ უნდა ისხდნენ.

"ბიძინას ისევ მივმართავ, რომ თუ კეთილად მოაქვს თავი, მაშინ ნუ ეყოლება უდანაშაულო ხალხი ციხეში", — განაცხადა სულაძემ TV პირველთან საუბარში.

იგი გამოეხმაურა ბიძინა ივანიშვილის გუშინდელ განცხადებას, სადაც ქართული ოცნების ყოფილმა თავმჯდომარემ ე.წ. კარტოგრაფების საქმის ერთ-ერთი ფიგურანტი, დავით ხიდაშელი გმირად მოიხსენია. გავრცელებული ინფორმაციით, სწორედ ხიდაშელმა ჩამოიტანა ქვეყანაში კარტოგრაფიული რუკები, რომლის საფუძველზე დაწყებული გამოძიების ფარგლებში დააკავეს ივერი მელაშვილი და ნატალია ილიჩოვა.

"ხიდაშელმა რაღაცა თუ მოიპოვა, ეს არ ნიშნავს იმას, რომ ვიღაცამ დანაშაული ჩაიდინა. მით უმეტეს, რომ რაც მოიპოვა, რამდენადაც ვიცი, არც ისე ძვირფასი რუკებია, ისინიც ხარვეზიანია და ვერაფერში ვერ იყენებენ ჯერჯერობით. წელიწადნახევარია თუ თითქმის ორი წელიც გახდება, რომ სხვა კომისიაა [საზღვრის დამდგენი], მაგრამ, რატომ ვერ გამოიყენეს ის რუკები?!", — განაცხადა თამარ სულაძემ.

კარტოგრაფების საქმე

29 სექტემბერს საქართველოს გენერალურმა პროკურატურამ განაცხადა, რომ 17 აგვისტოს თავდაცვის სამინისტროსგან მიიღეს ინფორმაცია, რომელიც ეხებოდა საქართველო-აზერბაიჯანის საზღვრის დელიმიტაცია-დემარკაციის კომისიის საქმიანობას. მათივე განცხადებით, დაიწყო გამოძიება, რომელიც უცხო ქვეყნისათვის საქართველოს ტერიტორიის ნაწილის გაცემისკენ მიმართული მოქმედებას ეხებოდა. როგორც უწყებაში ამბობენ, საქართველოს საზიანოდ მეზობელი ქვეყნისთვის 3 500-მდე ჰა ფართობი მიწის გადაცემის საფრთხე შეიქმნა.

2 ოქტომბერს, პირველმა არხმა გაავრცელა ინფორმაცია, რომ ორიგინალი რუკებისა, რომლის საფუძველზეც პროკურატურამ აზერბაიჯანთან საზღვრის დადგენის საქმეზე გამოძიება დაიწყო, ქართულ მხარეს ბიზნესმენმა, დავით ხიდაშელმა გადასცა. ვრცელდება ინფორმაცია იმაზეც, რომ რუკების დედნები მან რუსეთში საგარეო დაზვერვის დახმარებით მოიპოვა.

გაიგეთ მეტი რუკებზე:

საგამოძიებო ორგანოებმა ამ საქმეზე საზღვრის დამდგენი კომისიის წევრების, ივერი მელაშვილისა და ნატალია ილიჩოვას სახლები და სამუშაო ოფისები გაჩხრიკეს. ორივე მათგანი გამოძიების დაწყებას პოლიტიკას და არჩევნებს უკავშირდება.

7 ოქტომბერს კომისიის წევრები დააკავეს. 9 ოქტომბერს კი ილიჩოვასა და მელაშვილის აღკვეთის ღონისძიების სახით სასამართლომ პატიმრობა შეუფარდა.

ოპოზიცია მიმდინარე გამოძიებას წინასაარჩევნო პროცესს უკავშირებს. ნაწილი აცხადებს იმასაც, რომ ყარაბაღში მიმდინარე კონფლიქტის ფონზე მსგავსი გამოძიება პარტნიორ ქვეყანასთან ურთიერთობის დაძაბვის მცდელობაა. არასამთავრობო ორგანიზაციები ამბობენ, რომ საზღვარზე გამოძიება აჩენს ეჭვს პოლიტიკურ მოტივაციებზე.

მმართველ გუნდში ამას უარყოფენ და ამტკიცებენ, რომ მეზობელ ქვეყანასთან ურთიერთობას ვერაფერი დააზიანებს.