2020 წელს ნეტფლიქსის ახალი გახმაურებული სერიალის ლაზიერის გამბიტი (The Queen's Gambit) დამსახურებით ჭადრაკზე ძალიან ხშირად საუბრობდნენ. მათ შორის ყველაზე ხშირად განიხილავდნენ ქალების როლს ამ სფეროში, კონკრეტულად კი იხსენებდნენ ნონა გაფრინდაშვილის უმნიშვნელოვანეს მიღწევებს, რაც ზემოთ აღნიშნულ შოუშიც ახსენეს.

მართალია, ნეტფლიქსის სერიალის სიუჟეტი გამოგონილ ისტორიას ეფუძნება, თუმცა არსებობს რეალური ადამიანების რეალური ამბები, რომლებიც არანაკლებ საინტერესო, გასაოცარ და დაუჯერებელ დეტალებს შეიცავს და მათ შესახებ, სამწუხაროდ, ცოტა რამ ვიცით. სწორედ ამის გამოსასწორებლად ქართველმა რეჟისორმა თათია სხრიტლაძემ გადაიღო დოკუმენტური ფილმი დიდება დედოფალს, რომელიც ლეგენდარული ქართველი მოჭადრაკეების შესახებ მოგვითხრობს.

ნონა გაფრინდაშვილი, ნანა ალექსანდრია, მაია ჩიბურდანიძე და ნანა იოსელიანი — ეს ის სახელებია, რომლებმაც ჭადრაკის სამყაროში სამუდამოდ დაიკავეს შეუცვლელი ადგილები. ახალი ქართული დოკუმენტური ფილმიც სწორედ მათი კარიერის განვლილი გზის შესახებ მოგვითხრობს.

"60-იანი წლების დასაწყისიდან საბჭოთა კავშირის დაშლამდე, 30 წლის განმავლობაში, მსოფლიო ჭადრაკის სამეფოს სწორედ ეს ქალები განაგებდნენ. მათ რევოლუცია მოახდინეს და ქალთა ჭადრაკი საერთაშორისო კონტექსტში ვაჟთა ჭადრაკს გაუთანასწორეს", — ვკითხულობთ ფილმის აღწერაში.

თათია სხირტლაძის ნამუშევრის დიდება დედოფალს პრემიერა უკვე შედგა რამდენიმე ქვეყანაში, მათ შორის საქართველოშიც საერთაშორისო დოკუმენტური კინოფესტივალის "სინედოკის" ფარგლებში, თუმცა სულ მალე, 9 იანვარს, 22:00 საათზე მისი პირველი ონლაინპრემიერა გაიმართება: ფილმის ჩვენება ფეისბუქლაივის ფორმატში ეროვნული კინოცენტრის ოფიციალურ ფეისბუქგვერდზე შედგება.

ფილმის ტრეილერი შეგიძლიათ იხილოთ ქვემოთ მოცემულ ვიდეოში: