ქართული ოცნების აღმასრულებელი მდივნის, ირაკლი კობახიძის ინფორმაციით, მთავრობის შემადგენლობა არსებითად არ შეიცვლება. მისი განცხადებით, გამოკვეთილი ცვლილება მხოლოდ იუსტიციის სამინისტროშია მოსალოდნელი.

"არსებითად რჩება იგივე შემადგენლობა მთავრობის, რომელიც მუშაობდა აქამდე. რაც შეეხება ცალკეულ ცვლილებებს, იუსტიციის ნაწილში არის ჯერჯერობით გამოკვეთილი, რომ ცვლილება იქნება. სხვა რაიმე ინფორმაცია არ არსებობს, რაიმე ცვლილებასთან დაკავშირებით. აქედან გამომდინარე ჩვენ დაველოდებით პრემიერის პოზიციას. რაიმე მნიშვნელოვან ცვლილებას, მათ შორის ჯანდაცვის ნაწილში, ჩვენ არ ველოდებით", — განაცხადა ირაკლი კობახიძემ.

შეგახსენებთ, რომ იუსტიციის ყოფილმა მინისტრი, თეა წულუკიანი, მე-10 მოწვევის პარლამენტში განათლების, მეცნიერებისა და კულტურის კომიტეტის თავმჯდომარე იქნება. მან იუსტიციის მინისტრის თანამდებობა, რომელსაც რვა წლის განმავლობაში იკავებდა, 29 სექტემბერს დატოვა.

კორონავირუსის პანდემიის გამო ქვეყანაში შექმნილი ჯანდაცვის კრიზისის პირობებში, ჯანდაცვის მინისტრის პოსტზე ეკატერინე ტიკარაძის ჩანაცვლების საკითხი, რამდენჯერმე გახდა საზოგადოებრივი განხილვის საგანი. თუმცა, თავად ტიკარაძე ამბობს, რომ თანამდებობის დატოვება არ აპირებს.

გაიგეთ მეტი: