საერთაშორისო გამჭრვალობა — საქართველოს ანგარიშის მიხედვით, საქართველოში აღმასრულებელი ხელისუფლების ორგანოების, მათ შორის ყველაზე მაღალბიუჯეტიანი სამინისტროებისა და სამართალდამცავი უწყებების, საკვანძო პოსტებზე ისეთი პირები ინიშნებიან, რომლებიც ბიძინა ივანიშვილის ერთგულებით გამოირჩევიან, ან წარსულში მის კომპანიებში მუშაობდნენ.

რაც შეეხება კონკრეტულ მაგალითებს:

  • ყოფილი პრემიერმინისტრები — ირაკლი ღარიბაშვილი და გიორგი კვირიკაშვილი წარსულში ბიძინა ივანიშვილის კომპანიებში ქართუ ბანკში და ფონდ ქართუში წამყვანი პოზიციები ეკავათ.
  • შინაგან საქმეთა მინისტრი, ვახტანგ გომელაური წარსულში ივანიშვილის პირადი დაცვის უფროსად მუშაობდა, 2015-2019 წლებში კი გომელაური სახელმწიფო უსაფრთხოების სამსახურს ხელმძღვანელობდა.
  • ყოფილი გენერალური პროკურორი, შალვა თადუმაძე ივანიშვილის პირადი იურისტი იყო. 2012 წელს ივანიშვილის პრემიერმინისტრად დანიშვნისთანავე ის მთავრობის საპარლამენტო მდივანი გახდა, 2018 წელს მთავრობის ადმინისტრაციის უფროსი იყო, 2018-2019 წლებში გენერალური პროკურორობის შემდეგ ის უზენაესი სასამართლოს თავმჯდომარის მოადგილე გახდა.
  • სახელმწიფოს უსაფრთხოების სამსახურის უფროსს, გრიგოლ ლილუაშვილს წარსულში წამყვანი თანამდებობები ეკავა ბიძინა ივანიშვილის კუთვნილ კომპანიებში — ქართუ-ბანკი, ქართუ ჯგუფი, შპს შპს Old City Development, შპს ბურჯი, შპს ქართუ მშენებელი. 2016-2017 წლებში გრიგოლ ლილუაშვილი პარლამენტის წევრი იყო, მანამდე კი თბილისის მერის მოადგილე.
  • ინფრასტრუქტურის მინისტრი, მაია ცქიტიშვილი ყოფილი წარსულში ბიძინა ივანიშვილის კომპანიებში — ქართუ ბანკში, შპს ქართუ მენეჯმენტსა და შპს ბურჯში მუშაობდა. 2012 წლიდან ცქიტიშვილი მთავრობის ადმინისტრაციას ხელმძღვანელობდა.
  • ჯანდაცვის მინისტრი, ეკატერინე ტიკარაძე, ისევე, როგორც სერგეენკო, საჩხერის მრავალპროფილური საავადმყოფოს დირექტორი იყო, რომელსაც ივანიშვილის ფონდი ქართუ აფინანსებს.
  • ეკონომიკისა და ფინანსთა ყოფილი მინისტრი და ყოფილი ვიცე-პრემიერი, დიმიტრი ქუმსიშვილი ბიძინა ივანიშვილის კომპანიის ქართუ ბანკის დირექტორი იყო.
  • სახელმწიფო დაცვის სპეციალური სამსახურის უფროსი, ანზორ ჩუბინიძე, წარსულში ბიძინა ივანიშვილის პირადი დაცვის უფროსაც მუშაობდა.

ორგანიზაციის განცხადებით, ბევრი ამ საკვანძო თანამდებობის პირის, განსაკუთრებით პრემიერმინისტრების, თანამდებობაზე დანიშვნა და გათავისუფლება მიანიშნებს, რომ აღნიშნულ გადაწყვეტილებებს პირადად ბიძინა ივანიშვილი იღებდა, რაც, ზოგ შემთხვევაში, სამართლებრივი პროცედურების გვერდის ავლით ხდებოდა. მათივე თქმით, მიუხედავად იმისა, რომ კონსტიტუციის მიხედვით, საქართველოს მთავრობა ანგარიშვალდებულია პარლამენტის წინაშე, აღმასრულებელ ხელისუფლებაში მომხდარი ცვლილებების დროს პარლამენტის როლი მინიმალური იყო.