ბელარუსში არადემოკრატიულად ჩატარებული არჩევნების გამო შვეიცარია ალექსანდრ ლუკაშენკოს ყველა აქტივს ყინავს. როგორც შვეიცარიის მთავრობაში აცხადებენ, ლუკაშენკო და მისი შვილი ვიქტორი იმ 15 პირს შორის არიან რომელთაც ქვეყანაში შესვლა ეკრძალებათ.

როგორც განცხადებაშია ნათქვამი, ეს ადამიანები ძალადობასა და დაკავებებზე აგებენ პასუხს. გარდა ამისა, მათ ყველა იმ ადამიანის გათავისუფლება მოითხოვეს, რომლებიც უკანონოდ დააკავეს და სამართალდამცავების მხრიდან ძალადობის ფაქტებზე გამოძიება ჩატარდეს.

ბელარუსში საპროტესტო აქციები 9 აგვისტოს ჩატარებული საპრეზიდენტო არჩევნების შედეგების გამოცხადებისთანავე დაიწყო და დღემდე გრძელდება. მოსახლეობა არჩევნების შედეგებს არ აღიარებს. დემონსტრანტები პრეზიდენტ ალექსანდრ ლუკაშენკოს გადადგომასა და ხელახალი არჩევნების ჩატარებას მოითხოვენ. ადგილობრივი საარჩევნო კომისიის მიერ გამოქვეყნებულ არჩევნების შედეგებს გაერთიანებული ოპოზიციის კანდიდატი, სვეტლანა ტიხანოვსკაიაც არ ეთანხმება, რომელიც შედეგების გამოცხადების შემდეგ იძულებული გახდა, ქვეყანა დაეტოვებინა. მისი ინიციატივით, ძალაუფლების მშვიდობიანი გადაბარებისთვის საკოორდინაციო საბჭო შეიქმნა.

ევროპარლამენტმა ბელარუსში აგვისტოში ჩატარებულ არჩევნებს გაყალბებული უწოდა და არ აღიარა. ევროპარლამენტის თქმით, ლუკაშენკოს 5 ნოემბრიდან, როცა მისი უფლებამოსილების ვადა ამოიწურება, პრეზიდენტად აღარ აღიარებენ.

6 ნოემბერს ევროკავშირმა 15 ბელარუს მაღალჩინოსანს, მათ შორის პრეზიდენტ ალექსანდრ ლუკაშენკოს წინააღმდეგ სანქციები აამოქმედა. სანქციები მოიცავს ევროკავშირის ტერიტორიაზე მოგზაურობის შეზღუდვას და საბანკო ანგარიშების გაყინვას.