ნიუ-იორკში მცხოვრები 48 წლის გრიგოლ ჩაფიჩაძეს, რომელიც ერთ მილიონ დოლარზე მეტი ღირებულების ნივთების მოპარვაშია ბრალდებული, პოლიციამ მობილური ტელეფონისა და იმ გაქირავებული ავტომობილის საშუალებით მიაგნო, რომლებიც მან ქურდობებისას გამოიყენა. ამის შესახებ ინფორმაციას ამერიკული მედია ავრცელებს.

გრინვიჩის პოლიციის ცნობით, გასულ წელს დაფიქსირებულ ძარცვებთან დაკავშირებით, ჩაფიჩაძეს რამდენიმე ბრალდებას წაუყენეს — საცხოვრებელი სახლების ძარცვის მიზნით შეთქმულება, ქურდობა და ქონების დაზიანება.

ოქტომბრიდან დეკემბრამდე მომხდარ ძარცვებს საერთო ხასიათი ჰქონდა: ქურდები მეორე სართულზე გატეხილი ფანჯრებიდან შედიოდნენ, შემდეგ კი სახლების მთავარ საძინებლებსა და საგარდერობო ოთახებს ჩხრეკდნენ. უმეტესად იპარავდნენ ძვირადღირებული სამკაულს, მათ შორის ისეთი ბრენდების პროდუქციას, როგორიცაა Tiffany, Cartier, Hermès და Patek Philippe.

პოლიციის თქმით, მოპარული ქონების საერთო ღირებულება 1 მილიონ დოლარზე მეტია.

სასამართლოს ჩანაწერების თანახმად, ჩაფიჩაძეს 3 მილიონი დოლარის ოდენობის გირაო ჰქონდა შეფარდებული და ის სტამფორდის უზენაეს სასამართლოში 23 მარტს უნდა გამოცხადდეს.