ოცნების ხელისუფლების ჯანდაცვის სამინისტროს ინფორმაციით, ფსიქოტროპული მედიკამენტების არამართლზომიერად და ჭარბი ოდენობით გამოწერის გამო, 10 მედიკოსს პროფესიული პასუხისმგებლობა დაეკისრა – 1-ს საექიმო საქმიანობის სერტიფიკატი სამუდამოდ გაუუქმდა, 8-ს საქმიანობის უფლება 6 თვით შეეზღუდა, 1-ს კი წერილობითი გაფრთხილება მიეცა.

"პროფესიული განვითარების საბჭოზე დადგინდა, რომ ექიმების მიერ, ფსიქოტროპული მედიკამენტების რეცეპტების გაცემა ხდებოდა დასაბუთების, დიაგნოსტირებისა და პაციენტთან კონსულტაციის გარეშე.

ასევე, ერთ პაციენტზე, ერთდროულად, გამოწერილი იყო სხვადასხვა დასახელების, ისეთი ძლიერმოქმედი ფსიქოტროპული მედიკამენტები, როგორიცაა: "ლირიკა", "დიაზეპამი" და "ბაკლოფენი".

ცალკეულ შემთხვევებში, ფსიქოტროპული მედიკამენტების რეცეპტს გასცემდა ექიმი, რომელსაც შესაბამისი ნებართვა არ ჰქონდა. ასევე, მედიკამენტი გაიცემოდა, დღიურ დოზასთან შედარებით, ორჯერ და სამჯერ დიდი დოზით. ," — ვკითხულობთ განცხადებაში.

უწყების ცნობით, გამოვლენილი დარღვევების ცალკეული შემთხვევები, სამართლებრივი შეფასებისთვის საგამოძიებო უწყებებს გადაეცა.