"ოცნების" პარლამენტის თავმჯდომარე შალვა პაპუაშვილი მზადაა, ევროინტეგრაციის რისკებზე პრორუსულ მოძრაობა "ნეიტრალურ საქართველოსთან" დებატებში ჩაერთოს. ამის შესახებ მან ბრიფინგზე თქვა.

"ჩვენ მზად ვართ შევიდეთ დებატებში ნებისმიერ პოლიტიკურ ჯგუფთან ერთადერთი პირობით, რომ ისინი აღიარებენ საქართველოს როგორც სახელმწიფოს და მის კონსტიტუციურ წესრიგს, ჩვენ ამავე დროს ვთქვით, რომ მზად ვართ ვისაუბროთ ნებისმიერ თემაზე, მათ შრის არიან ჯგუფები, რომლებიც ფიქრობენ, რომ უმაღლეს განათლებას რეფორმა არ სჭირდება, მზად ვართ ამ ადამიანთან შევიდეთ დისკუსიაში. არიან ადამიანები შეიძლება, რომლებიც ამბობენ, რომ ევროინტეგრაცია რისკებს შეიცვას, მზად ვართ ვისაუბროთ ამ თემაზე ნებისმიერ ჯგუფთან. ჩვენ მზად ვართ დებატებზე და დისკუსიაზე ნებისმიერ საკითხთან დაკავშირებით. ევროინტეგრაციას რაც შეეხება, ამაზე არაერთხელ გვითქვამს, რომ ყოველთვის მნიშვნელოვანია რომ ინტეგრაციის პროცესში არ დაზიანდეს ჩვენი ქვეყანა. ...მნიშვნელოვანი, რომ არ აგვერიოს ევროინტეგრაცია მორჩილებაში და საკავშირო გაერთიანებაში შესვლაში, ისე როგორც ვიყავით საბჭოთა კავშირის დროს. როცა ცენტრი იყო მოსკოვი და ახლა უნდა იყოს საკავშირო ცენტრი ბრიუსელში. დღევანდელი ბრიუსელი, რა თქმა უნდა, სრულად არის აცდენილი იმ ღირებულებებს, რაზეც საქართველო დგას. ის პოლიტიკა, რომელიც დღეს ბრიუსელს აქვს აბსოლუტურად ეწინააღმდეგება ქართულ ღირებულებებს", — თქვა შალვა პაპუაშვილმა.