"პუბლიკას" ინფორმაციით, ანტონ ჩეჩინს, არტემ გრიბულსა და სერგეი კუხარჩუკს პროკურატურამ ახალი ბრალი წარუდგინა. უწყება მსჯავრდებულებს ციხეში ბანქოს თამაშს ედავება.

პროკურატურამ მსჯავრდებულებს ბრალი სსკ-ის 378 სეკუნდა მუხლის მეორე ნაწილით წარუდგინა, რაც პენიტენციურ დაწესებულებაში აკრძალული საგნით სარგებლობას ითვალისწინებს და 3-დან 5 წლამდე თავისუფლების აღკვეთას ითვალისწინებს. საქმის მასალებიდან ირკვევა, რომ საუბარია მუყაოს ფურცლებისგან დამზადებულ თვითნაკეთ ბანქოზე, რომელიც საკანში მყოფმა სხვა მსჯავრდებულმა დაამზადა, ხოლო დანარჩენი სამი — "ციხეში აკრძალული ნივთით სარგებლობდა".

ანტონ ჩეჩინის ადვოკატის, მარიამ ჯიქიას განცახდებით, მის დაცვის ქვეშ მყოფს ისთვის გასაგებ ენაზე პენიტენციურ დაწესებულებაში აკრძალული ნივთების სია არ ჰქონდა მიწოდებული. არც ერთი მსჯავრდებული ბრალს არ აღიარებს.

მსჯავრდებულები ამ დროისთვის სასჯელს იხდიან:

• ანტონ ჩეჩინი — რუსი აქტივისტი, პროევროპული აქციების დროს ნარკოდანაშაულის ბრალდებით დააკავეს და 8,5 წლით პატიმრობა მიუსაჯეს.

• არტემ გრიბული — დააკავეს მის მეუღლესთან, ანასტასია ზინოვკინასთან ერთად პროევროპული აქციების დროს ნარკოდანაშაულის ბრალდებით და 8,5 წლით პატიმრობა მიუსაჯეს. ანასტასია ზინოვკინაც ანტონ ჩეჩინის მსგავსად რუსი აქტივისტია.

• სერგეი კუხარჩუკი — დააკავეს 2024 წლის ნოემბრის პროევროპულ აქციებში მონაწილეობისთვის. მას ჯგუფური ძალადობა ედებოდა ბრალად და 2 წლით თავისუფლების აღკვეთა მიუსაჯეს.

ასევე იხილეთ:

• ანასტასია ზინოვკინა დახურული ტიპის ციხეში გადაიყვანეს, სადაც სატელეფონო ზარების განხორციელების უფლება და პაემნების რაოდენობა შეეზღუდება