"დაცული იქნება არხის არსებული სარედაქციო პოლიტიკა და ჰოლდინგში მომუშავე თითოეული თანამშრომლის უფლებები", — "პრაიმ მედია გლობალის" ხელმძღვანელის, ილია მიქელაიშვილის განცხადებას სამთავრობო ტელეკომპანია "იმედი" ავრცელებს. მისი თქმით, არხცის ახალი მფლობელები სოლიდური ინვესტიციის განხორციელებას გეგმავენ, რაც არხს კიდევ უფრო გააძლიერებს.

"როგორც საზოგადოებისათვის ცნობილია, "პრაიმ მედია გლობალი" წლებია ოპერირებს ქართულ მედიაბაზარზე და ქვეყანაში, ამ მიმართულებით, არის ერთ-ერთი მზარდი კომპანია. მოხარული ვარ, რომ წარმატებით დასრულდა მრავალთვიანი მოლაპარაკება ბიზნესმენ ირაკლი რუხაძესთან და შედეგად, ტელეკომპანია "იმედი" და მისი ჰოლდინგის ქვეშ შემავალი სხვა მედიასაშუალებები ამიერიდან სწორედ "პრაიმ მედია გლობალის" საკუთრებაში გადმოვა.

ჩვენ გვაქვს დიდი გეგმები, როგორც ტელეკომპანია "იმედთან", ასევე მთლიანად ჰოლდინგთან მიმართებით. ვაპირებ სოლიდური ინვესტიციის განხორციელებას და არხის კიდევ უფრო გაძლიერებას.

მეორე მხრივ, სრული პასუხისმგებლობით ვაცხადებ, რომ დაცული იქნება არხის არსებული სარედაქციო პოლიტიკა და ჰოლდინგში მომუშავე თითოეული თანამშრომლის უფლებები. ჩვენ სრულად ვიაზრებთ იმ პასუხისმგებლობას, რომ "იმედი" არის უპირობო ლიდერი ქართულ მედიასივრცეში და ჩვენი მიზანია ამ შედეგის გაფრთხილება და კიდევ უფრო გაუმჯობესება. ეს არის, რაც ამ ეტაპზე შემიძლია გითხრათ, დეტალურად კი ჩვენი გეგმების შესახებ ოდნავ მოგვიანებით ვისაუბრებ", — იმედის ახალი მფლობელის, ილია მიქელაიშვილის განცხადებას სამთავრობო ტელეკომპანია "იმედი" ავრცელებს.

"ნეტგაზეთის" ცნობით, "პრაიმ მედია გლობალი" 2019 წელაა რეგისტრირებული. ბოლო, 2026 წლის 23 იანვრით დათარიღებული ამონაწერით საჯარო რეესტრიდან, მისი მფლობელიცა და ერთპიროვნული მმართველიც ილია მიქელაიშვილია, რომელიც ასევე არის 100%-იანი წილის მფლობელი კომპანიებისა შპს ჯორჯიან მედია პროდაქშენ გრუპი [დირექტორი მაკა ლომიძე); შპს მედია ჰაბი სეილსჰაუსი [დირექტორი თავად მიქელაიშვილი]; დიასპორული მედიის ასოციაცია; შპს ექსკლუზივი მედია; შპს პირველი.

დოკუმენტაციის თანახმად, "ტელეიმედის" მფლობელი კომპანია "სიმბოლურ ფასად" — 1000 ლარად გაიყიდა.

შეგახსენებთ, რომ ცოტა ხნის "ტელე-იმედმა" გაავრცელა იმედის უკვე ყოფილი მფლობელის, ირაკლი რუხაძის განცხადება იმის შესახებ, რომ "იმედის" 50%-იანი წილის მფლობელი "პრაიმ მედია გლობალი" გახდა, ხოლო დანარჩენი 50% კი გადავიდა მაკა ლომიძისა და მისი 4 მოადგილის მფლობელობაში.